കഴിഞ്ഞ അഞ്ചു വര്ഷത്തില് പൊതുമേഖലാ ബാങ്കുകള് എഴുതിത്തള്ളിയത് 2.5 ലക്ഷം കോടി രൂപയുടെ കിട്ടാക്കടം. സ്റ്റേറ്റ് ബാങ്ക് ഓഫ് ഇന്ത്യ അടക്കമുള്ള 27 പൊതുമേഖലാ ബാങ്കുകള് 2016-17 വര്ഷത്തില് 81683 കോടി രൂപയാണ് എഴുതിത്തള്ളിയത്. ഇത് മുന് സാമ്പത്തിക വര്ഷത്തെക്കാളും 41 ശതമാനം വര്ദ്ധനവാണ് സൂചിപ്പിക്കുന്നത്.
എസ്.ബി.ഐയും അതിന്റെ അനുബന്ധ ബാങ്കുകളും മാത്രം 2016-17 സാമ്പത്തിക വര്ഷം 27574 കോടി രൂപയാണ് എഴുതിത്തള്ളിയത്. എസ്.ബി.ഐയുടെ കീഴിലുള്ള അഞ്ച് അനുബന്ധ ബാങ്കുകളെ കഴിഞ്ഞ ഏപ്രില് ഒന്നുമുതല് എസ്.ബി.ഐയില് ലയിപ്പിച്ചിരുന്നു. 2012-13ല് 27231 കോടി എഴുതിത്തള്ളിയപ്പോള് 2015-16ല് അത് 57586 കോടിയായി വര്ദ്ധിക്കുകയും 2016-17ല് 81683 കോടിയായി ഉയരുകയുമായിരുന്നു. കണക്കുകള് അനുസരിച്ച് 249927 കോടി രൂപയാണ് 2017 മാര്ച്ച് വരെയുള്ള അഞ്ച് സാമ്പത്തിക വര്ഷം കൊണ്ട് എഴുതിത്തള്ളിയത്.
വന്തോതില് പൊതുമേഖലാ ബാങ്കുകള് കടങ്ങള് എഴുതിത്തള്ളിയതിനെക്കുറിച്ച് ബി.ജെ.പിയോട് സി.പി.എം വിശദീകരണം ആവശ്യപ്പെട്ടിട്ടുണ്ട്.
Post Your Comments