സായുധ ഡ്രോണുകള്‍; ഇന്ത്യയുടെ ആവശ്യം പരിഗണനയിലെന്ന് അമേരിക്ക

ന്യൂഡല്‍ഹി: സായുധ ഡ്രോണുകള്‍ക്കു വേണ്ടി ഇന്ത്യ അഭ്യര്‍ഥിച്ചിരുന്നു. ഇന്ത്യയുടെ ഈ അഭ്യർഥന ട്രംപ് ഭരണകൂടത്തിന്റെ പരിഗണനയിലുണ്ടെന്ന് സൂചന. പേര് വെളിപ്പെടുത്താന്‍ ആഗ്രഹിക്കാത്ത മുതിര്‍ന്ന അമേരിക്കന്‍ ഉദ്യോഗസ്ഥനാണ് ഇക്കാര്യം വ്യക്തമാക്കിയതെന്ന് പി ടി ഐ റിപ്പോര്‍ട്ട് ചെയ്യുന്നു. ഇന്ത്യയും അമേരിക്കയും തമ്മിലുള്ള പ്രതിരോധബന്ധത്തെ കുറിച്ചുള്ള ചോദ്യത്തിന് മറുപടിയായിട്ടാണ് അദ്ദേഹം ഇക്കാര്യം പറഞ്ഞത്.

അമേരിക്കയില്‍നിന്ന് വ്യോമസേനയിലെ നവീകരണത്തിന്റെ ഭാഗമായി ഡ്രോണുകള്‍ വാങ്ങാന്‍ പദ്ധതിയിട്ടിരുന്നു. സേനയുടെ കരുത്ത് ഇവ വര്‍ധിപ്പിക്കുമെന്നാണ് വിലയിരുത്തുന്നത്. ഈ വര്‍ഷം ആദ്യമാണ് പ്രിഡേറ്റര്‍ സി അവഞ്ചെര്‍ വിഭാഗത്തില്‍ പെട്ട എയര്‍ക്രാഫ്റ്റുകള്‍ക്കു വേണ്ടി വ്യോമസേന അമേരിക്കയോട് അഭ്യര്‍ഥന നടത്തിയത്. വ്യോമസേനയ്ക്ക് 80 മുതല്‍ 100 എയര്‍ക്രാഫ്റ്റുകളാണ് ആവശ്യമായി വരികയെന്നാണ് കരുതുന്നത്.