ഓണച്ചിത്രങ്ങള് തിയേറ്ററില് എത്താന് ദിവസങ്ങള് ബാക്കി നില്ക്കെ കേരളത്തിന് അകത്തും പുറത്തുമായി വലിയ തിരക്കുകളിലാണ് മലയാളത്തിന്റെ പ്രിയതാരങ്ങള്. അജയ് വാസുദേവ് ചിത്രം മാസ്റ്റര്പീസിന്റെ കൊല്ലത്തെ ലൊക്കേഷനിലാണ് മെഗാസ്റ്റാര് മമ്മൂട്ടി. ഈ ചിത്രത്തില് മമ്മൂട്ടി കോളേജ് പ്രൊഫസറായാണ് എത്തുന്നത്. എഡ്ഡി എന്നാണ് കഥാപാത്രത്തിന്റെ പേര്. കുഴപ്പക്കാരായ വിദ്യാര്ത്ഥികള് പഠിക്കുന്ന കോളേജിലേക്ക് അതിനെക്കാള് പ്രശ്നക്കാരാനായ അദ്ധ്യാപകനെത്തുന്നതും തുടര്ന്നുണ്ടാകുന്ന സംഭവവികാസങ്ങളുമാണ് ചിത്രത്തിന്റെ പ്രമേയം. ഉണ്ണി മുകുന്ദന്, വരലക്ഷ്മി, പൂനം ബജ്വ, സന്തോഷ് പണ്ഡിറ്റ്, ഗോകുല് സുരേഷ് ഗോപി, മുകേഷ്, മഖ്ബൂല് സല്മാന്, പാഷാണം ഷാജി എന്നിവരാണ് ചിത്രത്തിലെ മറ്റ് താരങ്ങള്.
സിനിമയിലെ തിരക്കുകള്ക്ക് ഇടവേള നല്കി ചെന്നൈയില് വിശ്രമത്തിലാണ് സൂപ്പര് സ്റ്റാര് മോഹന്ലാല്. ലാല്ജോസ് ചിത്രം വെളിപാടിന്റെ പുസ്തകം അഭിനയിച്ചു പൂര്ത്തിയാക്കിയ ശേഷമാണ് മോഹന്ലാല് ചെന്നൈയില് എത്തിയിരിക്കുന്നത്. വെളിപാടിന്റെ പുസ്തകം ഓണത്തിന് തിയേറ്ററുകളില് എത്തും. കൂടാതെ, ഈ മാസം ഒടുവില് ശ്രീകുമാര് മേനോന് സംവിധാനം ചെയ്യുന്ന ഒടിയനില് അഭിനയിച്ച് തുടങ്ങും. ബനാറസിലാണ് ഷൂട്ടിംഗ് ആരംഭിക്കുന്നത്. മഞ്ജു വാര്യരാണ് ചിത്രത്തില് നായിക.
തെലുങ്ക് ചിത്രത്തിന്റെ ഷൂട്ടിംഗില് പങ്കെടുക്കുകയാണ് പ്രിയ നടന് ദുല്ഖര് സല്മാന്. മുന്കാല നായിക സാവിത്രിയുടെ കഥ പറയുന്ന മഹാനടി എന്ന ചിത്രത്തില് ജെമിനി ഗണേശനായാണ് ദുല്ഖര് വേഷമിടുന്നത്.മലയാളീ താരം കീര്ത്തി സുരേഷാണ് സാവിത്രിയെ അവതരിപ്പിക്കുന്നത്. നാഗ് അശ്വിനാണ് ചിത്രം സംവിധാനം ചെയ്യുന്നത്. എന്നാല്, അന്വര് റഷീദ് ചിത്രം ട്രാന്സില് അഭിനയിച്ച് വരികയാണ് ഫഹദ് ഫാസില്. ഈ സിനിമയുടെ ലൊക്കേഷന് കന്യാകുമാരിയാണ് . 15,16 തീയതികളില് ട്രാന്സിന്റെ ഷൂട്ടിംഗ് തിരുവനന്തപുരത്ത് നടക്കും. അന്വര് റഷീദ് എന്റര്ടൈന്മെന്റ് നിര്മ്മിക്കുന്ന ചിത്രത്തിന്റെ ഛായാഗ്രഹണം നിര്വഹിക്കുന്നത് അമല് നീരദാണ്.
മലയാളത്തിന്റെ പ്രിയ നടന് പൃഥ്വിരാജ് വിമാനം എന്ന ചിത്രത്തിന്റെ ലൊക്കേഷനിലാണ് . പ്രദീപ് നായര് സംവിധാനം ചെയ്യുന്ന ചിത്രത്തില് വിമാനം പറത്താന് ആഗ്രഹിക്കുന്ന ബധിരനും മൂകനുമായ ചെറുപ്പക്കാരന്റെ വേഷമാണ് ഈ നടന് അവതരിപ്പിക്കുന്നത്. റോഷന് ആന്ഡ്രൂസ് സംവിധാനം ചെയ്യുന്ന ബിഗ് ബഡ്ജറ്റ് ചിത്രമായ കായംകുളം കൊച്ചുണ്ണിയുടെ തയ്യാറെടുപ്പുകളിലാണ് നിവിന് പോളി. ചിത്രത്തിനായി കളരി അഭ്യാസവും കുതിരസവാരിയും നിവിന് ഇപ്പോള് പരിശീലിക്കുന്നുണ്ട്. ഷൂട്ടിംഗ് അടുത്തമാസം 10ന് ഉടുപ്പിയും മംഗലാപുരത്തുമായി തുടങ്ങും. എന്നാല് ശ്രീലങ്കയാണ് ചിത്രത്തിന്റെ പ്രധാന ലൊക്കേഷന്. ബോബി – സഞ്ജയ് ടീം തിരക്കഥ രചിക്കുന്ന ചിത്രം ഗോകുലം ഫിലിംസിന്റെ ബാനറില് ഗോകുലം ഗോപാലനാണ് നിര്മ്മിക്കുന്നത്. ക്രിക്കറ്റിന്റെ പശ്ചാത്തലത്തില് ഒരുങ്ങുന്ന ചിത്രമായ സച്ചിന്റെ ഷൂട്ടിംഗിലാണ് ധ്യാന് ശ്രീനിവാസന്.ഈ സിനിമയില് അജു വര്ഗീസും പ്രധാന വേഷത്തിലെത്തുന്നുണ്ട്.
Post Your Comments