പൂച്ചകളെ വീട്ടിനുള്ളിൽ വളർത്തുന്നത് ഇസ്ലാമിക വിരുദ്ധമെന്ന് ഐസിസ് ഭീകരർ. ഇറാഖിലെ മൊസൂളിൽ ഭീകരർ പൂച്ചകളെ വളർത്തുന്നത് മതനിന്ദയാണെന്ന് കാണിച്ച് ഫത്വ പുറപ്പെടുവിച്ചു. ഇപ്പോൾ ഭീകരർ ആരെങ്കിലും തെറ്റ് ചെയ്യുന്നുണ്ടോ എന്നറിയാൻ വീടുകൾ കയറി പരിശോധന നടത്തുകയാണ് .
മൊസൂളിൽ പൂച്ച വിലക്ക് നിലവിൽ വന്നത് ചൊവ്വാഴ്ചയാണ്. വിചിത്രമായ ഈ വിലക്കിനെക്കുറിച്ചറിഞ്ഞ് ആശങ്കയിലാണ് നാട്ടുകാർ. ഐസിസ് ഭീകരർ പൂച്ചകളുമൊത്തുള്ള ചിത്രങ്ങൾ സമീപകാലം വരെ ട്വിറ്ററിലും മറ്റും പോസ്റ്റ് ചെയ്യാറുണ്ടായിരുന്നു. പുതിയ ആളുകളെ സംഘത്തിലേക്ക് ആകർഷിക്കുന്നതിന്റെ ഭാഗമായിരുന്നു ഈ പോസ്റ്റുകൾ.
2014-ൽ ഐക്യരാഷ്ട്ര സഭ പുറത്തിറക്കിയ റിപ്പോർട്ടനുസരിച്ച് ഐസിസ് ഭീകരരുടെ ഈ ചിത്രങ്ങളിൽ ആകൃഷ്ടരായി സംഘടനയിൽ ചേർന്നത് ആയിരക്കണക്കിന് യുവാക്കളാണ്. 80-ലധികം രാജ്യങ്ങളിൽനിന്നുള്ള 15,000-ത്തോളം പേർ ഇങ്ങനെ പുതിയതായി സംഘടനയിൽ എത്തിയെന്നും ഈ റിപ്പോർട്ടിൽ പറഞ്ഞിരുന്നു. ഭീകരർ ഇതിനുവേണ്ടി ഇസ്ലാമിക് സ്റ്റേറ്റ് ഓഫ് ക്യാറ്റ് എന്ന ട്വിറ്റർ അക്കൗണ്ട് പോലും നിലനിർത്തിയിരുന്നു. ലോകത്തിന് ഐസിസിന്റെ വേറിട്ടൊരു മുഖം കാട്ടിക്കൊടുക്കുന്നതിനാണ് ഈ അക്കൗണ്ട് നിലനിർത്തിയിരുന്നത്. അതിനിടെ പൂച്ചകളെ വീട്ടിൽ വളർത്താൻ പാടില്ലെന്ന ഫത്വ വന്നതിന്റെ അടിസ്ഥാനമെന്തെന്നാണ് നാട്ടുകാർ ചോദിക്കുന്നത്.
Post Your Comments