KeralaLatest NewsHealth & Fitness

പ്രമേഹ രോഗികളിലുണ്ടാകുന്ന നേത്രപടല അന്ധത കണ്ടുപിടിക്കാന്‍ ആരോഗ്യവകുപ്പില്‍ നൂതന സംവിധാനം

തിരുവനന്തപുരം•പ്രമേഹ രോഗികളിലുണ്ടാകുന്ന നേത്രപടല അന്ധത അഥവാ ഡയബറ്റിക് റെറ്റിനോപ്പതി കണ്ടുപിടിക്കാന്‍ ആരോഗ്യ വകുപ്പില്‍ നൂതന സംവിധാനം ഏര്‍പ്പെടുത്തിവരുന്നതായി ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചര്‍. ഫണ്ടസ് ക്യാമറ ഉപയോഗിച്ച് കണ്ണിന്റെ റെറ്റിനയുടെ ചിത്രമെടുത്ത് പരിശോധിക്കുന്ന സംവിധാനമാണ് സംസ്ഥാനത്തെ തെരഞ്ഞെടുക്കപ്പെട്ട ആശുപ്രതികളില്‍ ഇപ്പോള്‍ ആരോഗ്യവകുപ്പ് ഏര്‍പ്പെടുത്തിക്കൊണ്ടിരിക്കുന്നത്. ഇതിനു വേണ്ടി നയനാമൃതം അഥവാ ഡയബറ്റിക് ററ്റിനോപ്പതി സ്‌കീനിംഗ് പ്രോഗ്രാം എന്ന പുതിയ പദ്ധതി ആവിഷ്‌കരിച്ചിട്ടുണ്ടെന്നും മന്ത്രി പറഞ്ഞു.

പ്രമേഹ രോഗത്തിന്റെ മൂന്ന് പ്രധാന സങ്കീര്‍ണതകളില്‍ ഒന്നായ നേത്രപടല അന്ധത ഫലപ്രദമായി കണ്ടുപിടിക്കുന്നതിനായി സംസ്ഥാനത്തെ എല്ലാ ജില്ലാ ആശുപ്രതികളിലും ഫണ്ടസ് ക്യാമറ ഉപയോഗിച്ചുളള രോഗനിര്‍ണയ സൗകര്യം ലഭ്യമാക്കുന്നതാണ്. തിരുവനന്തപുരം ജില്ലയില്‍ ഓര്‍ണേറ്റ് ഇന്ത്യ എന്ന പദ്ധതിയുടെ ഭാഗമായി 16 കുടുംബാരോഗ്യ കേന്ദ്രങ്ങളില്‍ ഹാന്റ് ഹെല്‍ഡ് ഫണ്ടസ് ക്യാമറ വാങ്ങി നല്‍കിയിട്ടുണ്ട്. ഇതിലൂടെ കുടുംബാരോഗ്യ കേന്ദ്രങ്ങളില്‍ വരുന്ന പ്രമേഹ രോഗികളില്‍ നേത്രപടല അന്ധത പരിശോധിക്കാനാണ് ഉദ്ദേശിക്കുന്നത്. ഇങ്ങനെ കണ്ടെത്തുന്ന രോഗികളെ വിദഗ്ധ ചികിത്സയ്ക്കായി നേത്രരോഗ വിദഗ്ധന്റെ സമീപത്തേയ്ക്ക് റഫര്‍ ചെയ്യുന്നതാണ്.

നേത്രപടല അന്ധത നേരത്തെ കണ്ടെത്തി കഴിഞ്ഞാല്‍ ലേസര്‍ ചികിത്സയിലൂടെയും ഫലപ്രദമായ കുത്തിവയ്പ്പിലൂടെയും രോഗം നിയന്ത്രണ വിധേയമാക്കാവുന്നതാണ്. ഇതിനായുളള ലേസര്‍ മെഷീന്‍ തിരുവനന്തപുരം ജനറല്‍ ആശുപത്രി, കോട്ടയം ജനറല്‍ ആശുപത്രി, ചിറയിന്‍കീഴ്, പുനലൂര്‍ താലൂക്ക് ആശുപ്രതി, നെയ്യാറ്റിന്‍കര, കണ്ണൂര്‍ ജില്ലാ ആശുപ്രതി, തിരുവനന്തപുരം കണ്ണാശുപ്രതി എന്നിവടങ്ങളില്‍ സജ്ജീകരിച്ചിട്ടുണ്ട്.

കുടുംബാരോഗ്യ കേന്ദ്രങ്ങളിലെ ഒരു സ്റ്റാഫ് നഴ്‌സിനും ഡോക്ടര്‍ക്കും നയനാമൃതം പദ്ധതിയോടനുബന്ധിച്ച് പരിശീലനം നല്‍കിയിട്ടുണ്ട്. കൂടാതെ കുടുംബാരോഗ്യ കേന്ദ്രങ്ങളില്‍ നിന്നും കണ്ടെത്തുന്ന രോഗികള്‍ക്ക് വിദഗ്ധ ചികിത്സ ഉറപ്പാക്കുന്നതിന് ആശ വേളണ്ടിയര്‍മാര്‍ക്ക് പരിശീലനം നല്‍കുന്നതാണ്.

പ്രമേഹ രോഗം ഉളളവരില്‍ വര്‍ഷത്തില്‍ ഒരിക്കലോ ഡോക്ടര്‍ നിര്‍ദേശിക്കുന്ന കാലയളവിലോ ഡയബറ്റിക് റെറ്റിനോപ്പതി പരിശോധന നടത്തേണ്ടതാണ്. ആരംഭത്തില്‍ തന്നെ ഇത് കണ്ടുപിടിച്ച് ചികിത്സിച്ചില്ലെങ്കില്‍ കണ്ണിനകത്ത് രക്തസ്രാവമുണ്ടാകുകയും ക്രമേണ റെറ്റിനല്‍ ഡിറ്റാച്ച്‌മെന്റ് എന്ന അവസ്ഥയില്‍ എത്തുകയും അന്ധതയ്ക്ക് കാരണമാകുകയും ചെയ്യാം. അതിനാല്‍ തന്നെ പ്രമേഹ രോഗികളില്‍ അന്ധതയ്ക്ക് കാരണമാകുന്ന ഈ രോഗം തുടക്കത്തിലേ തന്നെ കണ്ടുപിടിച്ച് ചികിത്സ ലഭ്യമാക്കേണ്ടത് വളരെ അത്യാവശ്യമാണ്.

Tags

Post Your Comments

Related Articles


Close
Close