പാലക്കാട്: പ്രായപൂർത്തിയാകാത്ത പെൺകുട്ടികൾ വാളയാറിൽ പീഡനത്തിനിരയായ കേസിലെ വീഴ്ചകൾ പരിശോധിയ്ക്കുന്ന ജുഡീഷ്യൽ കമ്മീഷൻ ഇന്ന് പെൺകുട്ടികളുടെ രക്ഷിതാക്കളിൽ നിന്നും മൊഴിയെടുക്കും. പാലക്കാട് ഗസ്റ്റ് ഹൗസിൽ രാവിലെ 11 നാണ് സിറ്റിംഗ്. കേസിൽ പബ്ലിക് പ്രോസിക്യൂട്ടറായി ഇടക്കാലത്ത് പ്രവർത്തിച്ചിരുന്ന ജലജ മാധവനിൽ നിന്നും കമ്മീഷൻ മൊഴി രേഖപ്പെടുത്തും.
കേസിലെ പ്രധാന പ്രതികളെയെല്ലാം കോടതി വെറുതെ വിട്ട സാഹചര്യത്തിലാണ് പൊലീസ് അന്വേഷണത്തിലെയും പ്രോസിക്യൂഷന്‍റെയും വീഴ്ച പരിശോധിക്കാൻ സർക്കാർ റിട്ടയേർഡ് ജില്ലാ ജഡ്ജി പി കെ ഹനീഫയെ ജുഡീഷ്യൽ കമ്മീഷനായി നിയോഗിച്ചത്. ഇതിന്‍റെ ഭാഗമായി കേസിലെ അന്വേഷണ ഉദ്യോഗസ്ഥരിൽ നിന്നും പബ്ലിക് പ്രോസിക്യൂട്ടർ ലതാ ജയരാജിൽ നിന്നും കമ്മീഷൻ നേരത്തേ മൊഴി രേഖപ്പെടുത്തിയിരുന്നു.
വാളയാറില്‍ സഹോദരങ്ങളായ പെണ്‍കുട്ടികള്‍ ലൈംഗീക പീഡനത്തിന് ഇരയായി ആത്മഹത്യ ചെയ്ത കേസില്‍ മൂന്നു പ്രതികളെയും കോടതി വെറുതെ വിടുകയായിരുന്നു. വി. മധു, എം. മധു, ഷിബു എന്നിവരെയാണ് പാലക്കാട് പോക്സോ കോടതി വെറുതെവിട്ടത്. പ്രതികള്‍ക്കെതിരായ കുറ്റം തെളിയിക്കാന്‍ പ്രോസിക്യൂഷന് സാധിച്ചില്ലെന്ന് ചൂണ്ടിക്കാട്ടിയാണ് പ്രതികളെ വെറുതെ വിട്ടത്.
Post Your Comments