വാഷിങ്ടണ്: കോവിഡ് 19 വൈറസിനുള്ള വാക്സിന് കണ്ടെത്താന് കോടികള് പ്രഖ്യാപിച്ച് മൈക്രോസോഫ്റ്റ് തലവന് ബില് ഗേറ്റ്സ്. വാക്സിന് കണ്ടുപിടിക്കാന് നിലവില് നടക്കുന്ന പരീക്ഷണങ്ങളില് ഏറ്റവും മികച്ച ഏഴ് കമ്പനികളില് ഗേറ്റ്സ് ഫൗണ്ടേഷന് എന്ന സംഘടന പണം മുടക്കുമെന്നാണ് ബില് ഗേറ്റ്സ് അറിയിച്ചിരിക്കുന്നത്. ‘ദ ഡെയ്ലി ഷോ’ എന്ന പരിപാടിക്കിടെയാണ് ബില് ഗേറ്റ്സിന്റെ പ്രഖ്യാപനം.’
കോവിഡ് വാക്സിന് കണ്ടെത്താനുള്ള പരീക്ഷണങ്ങള്ക്ക് സഹായം നല്കേണ്ടത് ഈ സാഹചര്യത്തില് അത്യാവശ്യമാണ്. നഷ്ടപ്പെടുത്താന് നമ്മുടെ കയ്യില് സമയമില്ല. കൊറോണ വൈറസിനെതിരെയുള്ള പോരാട്ടത്തില് സര്ക്കാരിനേക്കാള് മുന്നിലെത്താന് ഗേറ്റ്സ് ഫൗണ്ടേഷന് സാധിക്കുമെന്നും അദ്ദേഹം പറഞ്ഞു. വാക്സിനുണ്ടാക്കാന് ശ്രമിക്കുന്ന ഏറ്റവും മികച്ച ഏഴ് ഗവേഷണ സ്ഥാപനങ്ങള്ക്ക് അത് നിര്മിക്കാനുള്ള ഫാക്ടറി സംവിധാനങ്ങള് ഒരുക്കി നല്കും.
അവയില് രണ്ടെണ്ണം മാത്രമായിരിക്കും ചിലപ്പോള് ഉപകാരപ്പെടുക. പക്ഷെ, നമ്മള് ഏഴ് ഫാക്ടറികള് തന്നെ നിര്മിക്കും. നമുക്ക് കളയാന് ഇപ്പോള് സമയമില്ല. അനുയോജ്യമായ വാക്സിന് കണ്ടെത്താന് 18 മാസത്തോളമെടുക്കും. വാക്സിന് പരീക്ഷണം നടത്തുന്ന ഏറ്റവും മികച്ച ഗവേഷകര്ക്ക് അതിവിശിഷ്ടമായ ഉപകരണങ്ങള് വേണ്ടതുണ്ട്. നമ്മള് അതിന് വേണ്ടി ബില്യണ് കണക്കിന് ഡോളറുകള് നഷ്ടപ്പെടുത്തേണ്ടിവരും. അത്രയും തുക ഇപ്പോള് ചിലവഴിക്കല് അത്യാവശ്യമാണെന്നും അദ്ദേഹം പറഞ്ഞു.
നമ്മുടെ ഫൗണ്ടേഷന് പകര്ച്ച വ്യാധികളില് ആഴത്തിലുള്ള വൈദഗ്ധ്യമുണ്ട്. നമ്മുടെ കയ്യിലുള്ള പണം കാര്യങ്ങള് കുറച്ചുകൂടി വേഗത്തിലാക്കും -ബില് ഗേറ്റ്സ് കൂട്ടിച്ചേര്ത്തു.നേരത്തെ ബില് ഗേറ്റ്സും ഭാര്യ മെലിന്റ ഗേറ്റ്സും കോവിഡ് 19 പ്രതിരോധ പ്രവര്ത്തനങ്ങള്ക്ക് 10 കോടി ഡോളര് നല്കിയിരുന്നു.
Post Your Comments