ന്യൂഡല്ഹി: കോഴിക്കോട് റെയില്വേ സ്റ്റേഷനെ ലോകോത്തര നിലവാരമുള്ള സ്റ്റേഷനാക്കി ഉയര്ത്തുന്നതിനുള്ള പണികള് ഈ മാസം ആരംഭിക്കുമെന്ന് കേന്ദ്ര മന്ത്രി വി. മുരളീധരന്. മലബാര് ചേംമ്പര് ഓഫ് കോമേഴ്സ് പ്രതിനിധി സംഘത്തിനൊപ്പം കേന്ദ്ര റെയില്വേ മന്ത്രി അശ്വനി വൈഷ്ണവ്, വ്യോമയാനമന്ത്രി ജ്യോതിരാദിത്യ സിന്ധ്യ എന്നിവരെ സന്ദര്ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. മലബാറിലെ റെയില്, വ്യോമഗതാഗത മേഖലയിലെ പദ്ധതികള് സമയബന്ധിതമായി പൂര്ത്തിയാക്കുന്നത് സംബന്ധിച്ച് വിവിധ കേന്ദ്രമന്ത്രിമാരില് നിന്ന് ഉറപ്പ് ലഭിച്ചതായി അദ്ദേഹം കൂട്ടിച്ചേര്ത്തു.
കോഴിക്കോട് റെയില്വേ സ്റ്റേഷന് ഉള്പ്പെടെ രാജ്യത്തെ 23 സ്റ്റേഷനുകളാണ് ലോകോത്തര നിലവാരത്തിലെത്തിക്കുന്നത്. കോഴിക്കോട്-തൃശ്ശൂര് സ്റ്റേഷനുകളെ ബന്ധിപ്പിച്ച് മെമു സര്വീസ് ആരംഭിക്കുന്നത് പരിഗണിക്കാമെന്ന് റെയില്വെ മന്ത്രി ഉറപ്പു നല്കിയതായി അദ്ദേഹം അറിയിച്ചു. കോഴിക്കോട് വിമാനത്താവളത്തിലെ അപകടത്തിന്റെ പശ്ചാത്തലത്തില് നിര്ത്തിവച്ച വലിയ വിമാനങ്ങളുടെ സര്വീസ് പുനരാരംഭിക്കുന്നത് സംബന്ധിച്ച തീരുമാനം ഉടന് ഉണ്ടാകുമെന്നും വ്യോമയാനമന്ത്രി ജ്യോതിരാദിത്യ സിന്ധ്യ അറിയിച്ചു. വിമാനത്താവളത്തിന്റെ റണ്വേ വികസനം, ടെര്മിനല് വികസനം എന്നിവക്ക് സംസ്ഥാന സര്ക്കാര് ആവശ്യമായ ഭൂമി ലഭ്യമാക്കിയാല് തുടര് നടപടി സ്വീകരിക്കുമെന്ന് അദ്ദേഹം പറഞ്ഞു.
Post Your Comments