ടോസ്സിന് മിനിറ്റുകള്‍ക്ക് മുമ്പ് പാക് പര്യടനം ഉപേക്ഷിച്ച് ന്യൂസിലന്‍ഡ്: സ്റ്റേഡിയത്തിൽ പരിശോധന നടത്തി സുരക്ഷാ സേന

സുരക്ഷാ ഭീഷണി ചൂണ്ടിക്കാട്ടി പരമ്പരയിലെ ആദ്യ മത്സരത്തിന്റെ ടോസ്സിന് മിനിറ്റുകള്‍ക്ക് മുമ്പ് പാകിസ്താന്‍ പര്യടനത്തില്‍ നിന്ന് ന്യൂസിലാന്‍ഡ് പിന്മാറിയത് അപ്രതീക്ഷിതമായിരുന്നു. ന്യൂസിലാന്‍ഡ് സര്‍ക്കാര്‍ നല്‍കിയ സുരക്ഷാ മുന്നറിയിപ്പ് അനുസരിച്ചാണ് പിന്‍മാറ്റമെന്ന് കിവീസ് ക്രിക്കറ്റ് ബോര്‍ഡ് വ്യക്തമാക്കി. ന്യൂസിലാന്‍ഡ് പര്യടനം ഉപേക്ഷിച്ചതിന് ശേഷം, ബോംബ് നിർവീര്യമാക്കൽ സ്‌ക്വാഡും പാക്കിസ്ഥാൻ സുരക്ഷാ സേനയും സ്റ്റേഡിയത്തിൽ തിരച്ചിൽ നടത്തി.

റാവൽപിണ്ടിയിലെ മൂന്ന് ഏകദിനങ്ങളുടെ ആദ്യ മത്സരത്തിൽ ന്യൂസിലൻഡ് വെള്ളിയാഴ്ച പാകിസ്താനെ നേരിടേണ്ടതായിരുന്നു. മൂന്ന് ഏകദിനങ്ങളും രണ്ട് ടി-20 മത്സരങ്ങളുമാണ് പര്യടനത്തില്‍ ഉണ്ടായിരുന്നത്. 18 വര്‍ഷത്തിന് ശേഷമാണ് ന്യൂസിലാന്‍ഡ് ക്രിക്കറ്റ് ടീം പാകിസ്താനിലെത്തിയത്. സെപ്റ്റംബര്‍ 17 മുതല്‍ തുടങ്ങുന്ന മൂന്നു മത്സരങ്ങളടങ്ങുന്ന ഏകദിന പരമ്പരയും അഞ്ച് ടി20 യും കളിക്കാനായിരുന്നു സന്ദര്‍ശനം. സെപ്റ്റംബര്‍ 17, 19, 21 ദിവസങ്ങളില്‍ റാവല്‍പിണ്ടിയില്‍ ഏകദിന മത്സരങ്ങളും ലാഹോറില്‍ ടി 20 മത്സരങ്ങളുമാണ് സംഘടിപ്പിച്ചിരുന്നത്. സുരക്ഷാ ഭീഷണിയെ തുടർന്നാണ് ടീം മത്സരത്തിൽ നിന്നും പിന്മാറിയത്.

Also Read:നരേന്ദ്ര മോദിയുടെ ജന്മദിനത്തില്‍ റെക്കോര്‍ഡ് വാക്‌സിനേഷൻ നേട്ടവുമായി കർണാടക

മത്സരം തുടരില്ലെന്ന് തീരുമാനിച്ചുവെന്നും ടീം ഉടൻ തന്നെ തിരിക്കുമെന്നും ന്യൂസിലാൻഡ് ക്രിക്കറ്റ് ടീം ഒരു പ്രസ്താവനയിൽ വ്യക്തമാക്കി. സുരക്ഷാ ഭീഷണിയുടെ വിശദാംശങ്ങളെക്കുറിച്ചോ പുറപ്പെടുന്ന സ്ക്വാഡിന്റെ പുതുക്കിയ ക്രമീകരണങ്ങളെക്കുറിച്ചോ പ്രതികരിക്കില്ലെന്നും ന്യൂസിലാൻഡ് അധികൃതർ കൂട്ടിച്ചേർത്തു.

‘ഇത്തരത്തില്‍ പര്യടനം ഉപേക്ഷിക്കുന്നത് പാകിസ്താന്‍ ക്രിക്കറ്റ് ബോര്‍ഡിന് കനത്ത തിരിച്ചടിയാണെന്ന് ഞാന്‍ മനസ്സിലാക്കുന്നു. ഏറ്റവും മികച്ച രീതിയിലാണ് അവര്‍ ഞങ്ങളെ ഇവിടെ സ്വീകരിച്ചതും മത്സരങ്ങള്‍ക്കായി വേദികളൊരുക്കിയതും. പക്ഷേ, താരങ്ങളുടെ സുരക്ഷ അവഗണിക്കാനാകാത്തതിനാല്‍ പരമ്പരയില്‍നിന്ന് പിന്‍മാറുക മാത്രമാണ് പോംവഴി’ – ന്യൂസിലാന്‍ഡ് ക്രിക്കറ്റ് ബോര്‍ഡിന്റെ ചീഫ് എക്‌സിക്യുട്ടീവ് ഡേവിഡ് വൈറ്റ് പ്രസ്താവനയില്‍ വ്യക്തമാക്കി.

Also Read:വേട്ടക്കാരന് മന്ത്രി പുംഗവന്‍ ഹാലേലൂയ പാടുന്നു, വി എൻ വാസവനെ വിമർശിച്ച് സുന്നി മുഖപത്രം

മത്സരത്തിനായി ഇരു താരങ്ങളും ഗ്രൗണ്ടില്‍ ഇറങ്ങാതിരുന്നത് ആശയക്കുഴപ്പമുണ്ടാക്കിയിരുന്നു. കാണികളെ സ്റ്റേഡിയത്തിലേക്ക് കടത്തിവിടാതിരുന്നതും സംശയത്തിനിടയാക്കി. തുടര്‍ന്ന് സംഭവത്തില്‍ വ്യക്തത വരുത്തി ന്യൂസിലന്‍ഡ് ക്രിക്കറ്റ് രംഗത്തുവരികയായിരുന്നു. സര്‍ക്കാര്‍ നിര്‍ദ്ദേശപ്രകാരം പാകിസ്താനിലെ സുരക്ഷാ ഏര്‍പ്പാടുകളില്‍ സംശയമുണ്ടെന്ന് അധികൃതര്‍ അറിയിച്ചതിനാല്‍ പര്യടനത്തില്‍ നിന്ന് പിന്മാറാന്‍ ന്യൂസിലന്‍ഡ് തീരുമാനിക്കുകയായിരുന്നു.

#Pakistani security forces and Bomb disposal squads conducting search operations and sanitising cricket stadium. pic.twitter.com/FDEe4QvlhB

— Indian Military News (@indmilitarynews) September 17, 2021