ബിഗ് ബോസ് ഷോക്കെതിരെ ബിജെപി എംഎല്‍എ നന്ദ് കിഷോര്‍ ഗുജ്ജര്‍. ബിഗ് ബോസ് ഹിന്ദി പതിപ്പിനെതിരെയാണ് എംഎല്‍എ രംഗത്തെത്തിരിക്കുന്നത്. ഇത് സംബന്ധിച്ച് അദ്ദേഹം ഗുജ്ജര്‍ വാര്‍ത്താവിതരണ മന്ത്രാലയത്തിന് കത്ത് നല്‍കിയിരുന്നു. ബിഗ് ബോസ് ഷോയിൽ അശ്ലീലവും പ്രാകൃതവുമാണെന്നും കുടുംബത്തിനൊപ്പം കാണാന്‍ കൊള്ളാത്തതാണെന്നുമാണ് കത്തില്‍ ആരോപിക്കുന്നത്. ഷോ പ്രക്ഷേപണം ചെയ്യുന്നത് അവസാനിപ്പിക്കണമെന്നും അദ്ദേഹം ആവശ്യപ്പെടുന്നു.
” ബിഗ് ബോസില്‍ രാജ്യത്തിന്‍റെ സംസ്കാരിക മൂല്യങ്ങളെ ഹനിക്കുന്ന വളരെ അടുത്തിടപഴകുന്ന രംഗങ്ങളുണ്ട്. വ്യത്യസ്ത ജാതിയില്‍ നിന്നുള്ളവര്‍ ഒരുമിച്ച് ഒരു കിടക്കയില്‍ കിടക്കുന്നത് അംഗീകരിക്കാനാവില്ല. ഒരു ഭാഗത്ത് പ്രധാനമന്ത്രി നരേന്ദ്രമോദി ഇന്ത്യയുടെ നഷ്ടപ്പെട്ട പ്രതാപം തിരുച്ചുപിടിക്കാന്‍ ശ്രമിക്കുമ്പോള്‍ മറുപക്ഷത്ത് ഇത്തരം ഷോകള്‍ രാജ്യത്തിന്‍റെ സംസ്കാരത്തെ നശിപ്പിക്കുന്നു”വെന്നും നന്ദ് കിഷോര്‍ പറഞ്ഞു.
ഇത്തരം കാര്യങ്ങള്‍ ഭാവിയില്‍ സംഭവിക്കാതിരിക്കാന്‍ ടെലിവിഷന്‍ പരിപാടികൾ സെന്‍സറിംഗിന് വിധേയമാക്കണമെന്നും എംഎല്‍എ ആവശ്യപ്പെടുന്നു. ബിഗ് ബോസിനെതിരെ ബ്രാഹ്മണ്‍ മഹാസഭയും രംഗത്തെത്തിയിട്ടുണ്ട്. ഗാസിയാബാദ് ജില്ലാ മജിസ്ട്രേറ്റിന് മഹാസഭ നിവേദനം നല്‍കിയിട്ടുണ്ട്
Post Your Comments