പൗരത്വ ഭേദഗതി നിയമത്തിനും ബിജെപിയ്ക്കുമെതിരെ വിമര്‍ശനവുമായി രഞ്ജി പണിക്കര്‍. നിയമം നടപ്പിലാക്കുകയല്ല രാജ്യത്ത് ഹിന്ദുവെന്നും മുസ്ലീമെന്നും രണ്ട് ചേരി തിരിക്കുകയാണ് ബിജെപിയുടെ ലക്ഷ്യമെന്ന് രഞ്ജി പണിക്കര്‍ പറഞ്ഞു. കൊച്ചിയില്‍ നടന്ന പ്രതിഷേധ പരിപാടിയില്‍ സംസാരിക്കുകയായിരുന്നു രഞ്ജി പണിക്കര്‍.
നിയമം നടപ്പിലാക്കുകയല്ല മോദിയുടെയും ബിജെപിയുടെയും ലക്ഷ്യം. ഈ നിയമം കൊണ്ട് ഉദ്ദേശിക്കുന്നത് ഇതിനോടകം സാധിച്ചു കഴിഞ്ഞെന്നും രഞ്ജി പണിക്കര്‍ പറഞ്ഞു. രാജ്യത്ത് ധ്രുവീകരണമുണ്ടാക്കുകയാണ് ബിജെപിയുടെ ലക്ഷ്യമെന്നും അദ്ദേഹം അഭിപ്രായപ്പെട്ടു.
ഈ രാജ്യത്തെ ഹിന്ദുവിനെയും മുസ്ലീമിനെയും രണ്ട് ചേരികളിലായി അണി നിരത്തുക, പരസ്പരം ആയുധമെടുക്കാന്‍ പ്രേരിപ്പിക്കുക എന്ന നിഗൂഢമായ ലക്ഷ്യത്തിനപ്പുറം ഈ നിയമത്തില്‍ എന്തെങ്കിലുമുണ്ടെന്ന് താന്‍ വിശ്വസിക്കുന്നില്ലെന്നും അദ്ദേഹം പറഞ്ഞു. അത് സാധിച്ചെടുക്കാനാണ് മോദിയും അമിത് ഷായും ശ്രമിക്കുന്നതെന്നും അതിനെയാണ് ചെറുക്കേണ്ടതെന്നും അദ്ദേഹം വ്യക്തമാക്കി.
നിയമത്തിലൂടെ ഇന്ത്യയുടെ മതേതര സംസ്കാരം നശിച്ചാല്‍ അത് രാജ്യത്തിന്‍റെ സമ്പൂര്‍ണ തകര്‍ച്ചയായിരിക്കുമെന്നും അദ്ദേഹം പറഞ്ഞു. രാജ്യത്തിന്‍റെ അതിര്‍ത്തിയില്‍ എത്ര സെെനിക വ്യൂഹങ്ങളെ നിരത്തിയാലും രാജ്യത്തിന് അകത്ത് ജനങ്ങള്‍ രണ്ടായി വിഭജിച്ചു കഴിഞ്ഞാല്‍ അഖണ്ഡത കാത്തുസൂക്ഷിക്കാന്‍ കഴിയില്ലെന്നും രഞ്ജി പണിക്കര്‍ പറഞ്ഞു.
Post Your Comments