താരങ്ങളുടെ പ്രകനടത്തെ കുറിച്ച് ആരാധകര്‍ തങ്ങളുടെ അഭിപ്രായം സോഷ്യല്‍ മീഡിയയിലൂടെ തുറന്ന് പറയുന്നത് പതിവാണ്. അങ്ങനെ തന്നെ കുറിച്ചുള്ള ആരാധകന്‍റെ കുറിപ്പ് മറുപടി നല്‍കിയിരിക്കുകയാണ് മണിക്കുട്ടന്. 2019 ല്‍ മലയാള സിനിമ കണ്ട വേറിട്ട മുഖമെന്നാണ് മണിക്കുട്ടനെ ഷിയാസ് മിര്‍സ എന്ന ആരാധകന്‍ പറയുന്നത്.
2019 കടന്നു പോകുമ്പോള്‍ ഞാന്‍ ഒരു വര്‍ഷക്കാലം കൊണ്ട് കണ്ടു തീര്‍ത്ത സിനിമകളുടെ എണ്ണം എടുക്കുന്നത് ഒരു പണിപ്പെട്ട ജോലിയാണെങ്കിലും കഴിഞ്ഞ വര്‍ഷത്തെ സിനിമകളില്‍ കണ്ട വേറിട്ട ഒരു മുഖത്തിനുടമയെപ്പറ്റി പറയാതെ പോകുന്നത് ശരിയല്ലെന്ന് പറഞ്ഞാണ് സയ്യിദ് ഷിയാസ് മിര്‍സ പോസ്റ്റ് ആരംഭിക്കുന്നത്.
”മലയാള സിനിമ ഇതുവരെയും വേണ്ട രീതിയില്‍ ഉപയോഗിച്ചിട്ടില്ലാത്ത മണിക്കുട്ടന് എന്ന നടനെപ്പറ്റിയാണ് എനിക്ക് പറയാനുള്ളത്. ഈ വര്‍ഷം അവസാനം തിയേറ്ററുകളില്‍ എത്തിയ രണ്ടു സിനിമകള്‍ മാത്രം മതി ഈ നടന്റെ റേഞ്ചളക്കാന്‍. മിനിസ്‌ക്രീനിലൂടെ കായംകുളം കൊച്ചുണ്ണിയായി മലയാളികളുടെ മനം കവര്‍ന്ന ഈ നടന്‍ മാമാങ്കം, തൃശൂര്‍ പൂരം എന്നീ രണ്ടു സിനിമകളിലൂടെയാണ് ‘ഞാന്‍ ഇവിടെ നിറഞ്ഞാടും’ എന്ന് അഭിനയ മികവിലൂടെ സ്വയം സ്ഥാപിച്ചെടുക്കുന്നത്” ഷിയാസ് പറയുന്നു.
മാമാങ്കത്തില്‍ പ്രത്യക്ഷപ്പെടുന്ന രംഗങ്ങളിലൊക്കെയും പ്രേക്ഷക ശ്രദ്ധ ആകര്‍ഷിക്കുന്ന വിധത്തില്‍ സ്ക്രീനില്‍ നിറയാന്‍ കഴിഞ്ഞ ഈ താരം തൃശ്ശൂര്‍ പൂരത്തില്‍ ജയസൂര്യയ്ക്കൊപ്പം ആദ്യം മുതല്‍ അവസാനം വരെ നിറഞ്ഞു നില്‍ക്കുകയായിരുന്നുവെന്നും ഷിയാസ് പറയുന്നു. തൃശ്ശൂര്‍ പൂരമെന്ന ചിത്രത്തില്‍ തനി ഗുണ്ടയുടെ കെട്ടിലും മട്ടിലും എത്തി ഫെെറ്റ് സീനുകളില്‍ നൂറു ശതമാനം പ്രതിബദ്ധത കാട്ടിയ മണിക്കുട്ടന് സത്യത്തില്‍ ഒരു ഗുണ്ടയാണോ എന്ന് അയാളുടെ സിനിമയിലെ പല മാനറിസങ്ങളും എന്നില്‍ സംശയമുണര്‍ത്തിയെന്നും അദ്ദേഹം പറയുന്നു.
പേരിലെ കുട്ടിത്തം ഓരോ സിനിമകളിലൂടെയും ഇല്ലാതാകുന്ന മണിക്കുട്ടന് മികച്ച വേഷങ്ങള്‍ കിട്ടിയാല്‍ അയാള്‍ ആ അവസരങ്ങള്‍ പരമാവധി മുതലാക്കും എന്നതില്‍ തര്‍ക്കമില്ലെന്നും ഷിയാസ് കുറിക്കുന്നു. പിന്നാലെ ഷിയാസിന്‍റെ പോസ്റ്റിന് മറുപടിയുമായി മണിക്കുട്ടന് തന്നെ രംഗത്തെത്തുകയായിരുന്നു.
”സത്യമായിട്ടും ഞാനൊരു ഗുണ്ടയല്ല ചേട്ടാ.. കുട്ടിക്കാലം മുതൽ കണ്ടും കേട്ടും കടന്നുപോയ എല്ലാ അനുഭവങ്ങളെയും പ്രാർത്ഥനയുടെയും 100% ആത്മാർത്ഥതയോടു കൂടിയും മാത്രമേ സമീപിച്ചിട്ടുള്ളു.ഓരോ കഥാപാത്രത്തിനു വേണ്ടിയും നമ്മൾ ഇടുന്ന എഫേര്‍ട്ടിനു ലഭിക്കുന്ന പ്രതിഫലമായി ഈ പോസ്റ്റിനെ കാണുന്നു. ഒരിക്കല്‍ കൂടി എടുത്തു പറയട്ടേ ഞാന്‍ ഒരു ഗുണ്ടയല്ല” എന്നായിരുന്നു താരത്തിന്‍റെ മറുപടി.
Post Your Comments