പ്രശസ്ത ബോളിവുഡ് നടന്റെ മാനേജർ ദിഷ സാലിയൻ ജീവനൊടുക്കി; നടുക്കം മാറാതെ ബോളിവുഡ്

ദിഷ സാലിയൻ ജീവനൊടുക്കി, ബോളിവുഡ് സിനിമാ ലോകത്തെ സജീവ ചലച്ചിത്ര പ്രവർത്തക ദിഷ സാലിയൻ ആത്മഹത്യ ചെയ്തു. പതിനാലാം നിലയിൽ നിന്ന് താഴേക്ക് ചാടുകയായിരുന്നു. നടന്മാരായ സുശാന്ത് സിങ് രാജ്പുതിൻ്റെയും വരുൺ ശർമ്മയുടെയും മുൻ മാനേജറായിരുന്നു ദിഷ.

മുംബൈ മലാടിലെ ജൻകല്യാൺ മേഘലയിലുള്ള പതിനാല് നില കെട്ടിടത്തിന് മുകളിൽ നിന്നാണ് ദിഷ ചാടിയതെന്നാണ് ദേശീയ മാധ്യമങ്ങളുടെ റിപ്പോർട്ടുകൾ വ്യക്തമാക്കുന്നത്. മലാടിലുള്ള സുഹൃത്തിൻ്റെ വീട്ടിലായിരുന്നു ദിഷ(28)യെന്നും ഇരുവരും വിവാഹിതരാകാൻ തീരുമാനിച്ചിരുന്നതായും റിപ്പോർട്ടുകൾ പുറത്ത് വരുന്നുണ്ട്.

എന്നാൽ മൊത്തം ആറു സുഹൃത്തുക്കളുണ്ടായിരുന്നുവെന്നും രാത്രി ഭക്ഷണത്തിന് ശേഷം എല്ലാവരും നന്നായി മദ്യപിച്ചിരുന്നെന്നും മൽവാനി പോലീസ് സ്റ്റേഷനിലെ സീനിയർ ഇൻസ്പെക്ടർ ജഗ്ദേവ് കലപഡ് പറയുന്നു, ദിഷ മദ്യലഹരിയിലായിരുന്നുവെന്നും അപ്പാർട്ട് മെൻ്റിലെ വിൻഡോയ്ക്കരികിൽ നിന്ന് രാത്രി ഒരുമണിയോടെയാണ് ദിൽ താഴേക്ക് ചാടുന്നതെന്നും ഇൻസ്പെക്ടർ ചൂണ്ടിക്കാട്ടുന്നു. മുംബൈയിലെ പ്രധാന മാധ്യമത്തിന് നൽകിയ സ്റ്റേറ്റ്മെൻ്റിലാണ് സീനിയർ ഇൻസ്പെക്ടർ ഇക്കാര്യം വ്യക്തമാക്കിയിരിയ്ക്കുന്നത്.

കൂടാതെ പോലീസ് വിവരം അറിയുന്നത് പുലർച്ചെ 2.25 ഓടെയാണെന്നും ഉടൻ സംഭവസ്ഥലത്തെത്തിയെന്നും ബോറിവാലിയിലെ ആശുപത്രിയിലെത്തിച്ച് മരണം സ്ഥിരീകരിച്ച ശേഷമാണ് ബോഡി പോസ്റ്റ് മോർട്ടത്തിനായി വിട്ടു നൽകിയതെന്നും ജഗ്ദേവ് വ്യക്തമാക്കി.