അന്താരാഷ്ട്ര ചലച്ചിത്ര മേള ; ശ്രീധറിന്റെ ‘ഇൻ ഔർ വേൾഡ് ‘ 18ന് പ്രദർശിപ്പിക്കും

തിരുവനന്തപുരം: 51-ാമത് അന്താരാഷ്ട്ര ചലച്ചിത്ര മേളയിൽ ശ്രീധർ ബി. എസ് സംവിധാനം ചെയ്ത ഡോക്യുമെന്ററി ‘ഇൻ ഔർ വേൾഡ്’ നോൺ ഫിക്‌ഷൻ വിഭാഗത്തിൽ 18-ന് പ്രദർശിപ്പിക്കും. ഓട്ടിസം ബാധിച്ച മൂന്ന് കുട്ടികളുടെ ജീവിതമാണ് ഡോക്യുമെന്ററിയിൽ.

ചിത്രത്തിന്റെ നിർമ്മാതാവ് കൂടിയായ ശ്രീധർ ബി എസ് തിരുവനന്തപുരം സ്വദേശിയാണ്. ഫിലിം, ടെലിവിഷൻ-ഡിജിറ്റൽ കണ്ടന്റ് ബ്രാൻഡിംഗ്, മാർക്കറ്റിംഗ് മേഖലകളിൽ 22 വർഷത്തെ പരിചയമുള്ള ശ്രീധർ ബി എസ്,​ ടേണർ ബ്രോഡ്കാസ്റ്റ്, നാഷണൽ ജിയോഗ്രാഫിക്, ഫോക്സ്, ഫോഡ്, ബി എം ഡബ്ല്യു, സോണി മോഷൻ പിക്ചേഴ്സ് തുടങ്ങിയ അന്താരാഷ്ട്ര സ്ഥാപനങ്ങളുമായി ചേർന്ന് പ്രവർത്തിച്ചിട്ടുണ്ട്. 43 ദേശീയ, അന്തർദേശീയ പുരസ്കാരങ്ങൾ നേടിയിട്ടുണ്ട്. സാൾട്ട് സ്റ്റുഡിയോസ് ചെയർമാനായും നാഷണൽ ജിയോഗ്രാഫിക്, ഫോക്സ് ഇന്റർനാഷണൽ ചാനലുകളുടെ ക്രിയേറ്റീവ് ഡയറക്ടറായും പ്രവർത്തിച്ചിട്ടുണ്ട്.