രസകരമായ കാര്യം അവൾ ഒരു ഡബ്ബിംഗ് ആർട്ടിസ്റ്റല്ല, ഒരു നടിയാണ് ; ശ്രുതിയ്ക്ക് ലഭിച്ച പുരസ്കാരത്തെക്കുറിച്ച് ഭർത്താവ്

ഇത്തവണ മികച്ച ഡബ്ബിങ് ആർട്ടിസ്റ്റിനുള്ള സംസ്ഥാന ചലച്ചിത്ര പുരസ്കാരം നേടിയത് പ്രേഷകരുടെ പ്രിയങ്കരിയായ നടി ശ്രുതി രാമചന്ദ്രനാണ്. ഇപ്പോഴിതാ ശ്രുതിയെ അഭിനന്ദിച്ച് ഭർത്താവ് ഫ്രാൻസിസ് തോമസ് സാമൂഹ്യ മാധ്യമങ്ങളിൽ പങ്കുവച്ച ഒരു കുറിപ്പാണ് വൈറലാകുന്നത്.

ആർകിടെക്റ്റും, അഭിനേത്രിയുമായ ശ്രുതി എങ്ങനെയാണ് ഡബ്ബിങ് ആർട്ടിസ്റ്റിലേക്ക് എത്തിയതെന്ന കഥ രസകരമായ രീതിയിൽ പ്രേക്ഷകരുമായി പങ്കുവെക്കുകയാണ് ഫ്രാൻസിസ് തോമസ്.

ഫ്രാൻസിസിന്റെ വാക്കുകൾ

“എന്റെ ഭാര്യ മികച്ച വനിതാ ഡബ്ബിംഗ് ആർട്ടിസ്റ്റിനുള്ള അമ്പതാമത്തെ കേരള സംസ്ഥാന ചലച്ചിത്ര അവാർഡ് നേടി – ഇത് അവിശ്വസനീയമായ നേട്ടമാണ്,” എന്ന് പറഞ്ഞാണ് ഫ്രാൻസിസിനെറെ കുറിപ്പ് തുടങ്ങുന്നത്.“ശ്രുതിയുടെ ആർക്കിടെക്റ്റാണ് എന്നിരുന്നാലും അതിശയകരമായ കാര്യം അതല്ല. അവൾ ബാഴ്സലോണയിലെ പ്രശസ്തമായ ഐ‌എ‌എ‌സി സ്കൂളിൽ നിന്ന് മാസ്റ്റേഴ്സ് ഓഫ് സസ്റ്റെയിനബിൾ ഡിസൈനിൽ ക്ലാസ്സോട് കൂടെ ബിരുദം നേടി. രസകരമായ കാര്യം അതല്ല. അവൾ ഒരു ഡബ്ബിംഗ് ആർട്ടിസ്റ്റല്ല – അവൾ ഒരു നടിയാണ്,” ഫ്രാൻസിസ് കുറിച്ചു.

“കഴിഞ്ഞ വർഷം, അവൾ അഭിനയിച്ച ‘പ്രേതം’ എന്ന സിനിമയുടെ സംവിധായകൻ രഞ്ജിത്ത് ശങ്കർ അവളെ ഒരു സഹായത്തിനായി വിളിച്ചു – അദ്ദേഹം എഡിറ്റിംഗ് പൂർത്തിയാക്കിയ പുതിയ ചിത്രം ‘കമല’യാണ്, പക്ഷേ നായികയ്ക്ക് വേണ്ടി ഡബ് ചെയ്യാൻ കഴിയുന്ന ആരെയും കണ്ടെത്താനായില്ല. നായിക മലയാളം സംസാരിക്കാത്ത ആളാണ്. അദ്ദേഹം മിക്ക പ്രൊഫഷണൽ ഡബ്ബിങ് ആർട്ടിസ്റ്റുകളെയും സമീപിച്ചു. കുറച്ച് അഭിനേതാക്കളെ പോലും കണ്ടു. പക്ഷേ അദ്ദേഹം തൃപ്തനായില്ല.

ശ്രുതി സ്റ്റുഡിയോയിലെത്തി ചില സംഭാഷണങ്ങൾ പറഞ്ഞു കേൾപ്പിച്ചു. അദ്ദേഹത്തിന് അത് ഇഷ്ടപ്പെട്ടു. വെറും രണ്ട് ദിവസത്തിനുള്ളിൽ സിനിമയുടെ ഡബ് മുഴുവൻ പൂർത്തിയാക്കി. പിന്നെ ആ കാര്യമെല്ലാം മറന്നു,” ശ്രുതി ഡബ്ബിങ് ആർട്ടിസ്റ്റ് ആയ കഥ ഫ്രാൻസിസ് കുറിച്ചു.പുരസ്കാരം നേടിയപ്പോൾ ശ്രുതിക്ക് ആദ്യം വിശ്വസിക്കാനായില്ലെന്നും ഫ്രാൻസിസ് പറഞ്ഞു.”ഏകദേശം ഒരു വർഷത്തിനുശേഷം ഒരു ഉച്ചതിരിഞ്ഞ് അവളുടെ ഫോൺ റിങ്ങ് ചെയ്യാൻ തുടങ്ങി.

അവളെ അഭിനന്ദിക്കാൻ എല്ലായിടത്തുനിന്നും ആളുകൾ വിളിക്കുന്നു. സംസ്ഥാന അവാർഡ് വിജയികളെ പ്രഖ്യാപിച്ചു. അവളുടെ പേര് പട്ടികയിലുണ്ട്. അവൾ ആശയക്കുഴപ്പത്തിലാണ്. ഇത് ഒരു തമാശയാണെന്ന് കരുതി ആദ്യ കുറച്ച് ആളുകളുടെ കോൾ കട്ട് ചെയ്യുന്നു. അപ്പോൾ അവളുടെ മുത്തശ്ശിയും വിളിച്ചു. സംവിധായകൻ അവളെ പുരസ്കാരത്തിനായി നാമനിർദേശം ചെയ്തിരുന്നു. അവളോട് അത് പറഞ്ഞിരുന്നില്ല. അവൾ വിജയിച്ചു,” ഫ്രാൻസിസ് കുറിച്ചു.

2014ൽ പുറത്തിറങ്ങിയ ഞാൻ എന്ന സിനിമയിലൂടെയാണ് ശ്രുതി മലയാള സിനിമയിലേക്ക് അരങ്ങേറ്റം കുറിക്കുന്നത്. 2016ൽ പുറത്തിറങ്ങിയ പ്രേതത്തിലെ കഥാപാത്രം ശ്രദ്ധിക്കപ്പെട്ടു്. സൺഡേ ഹോളിഡേ തുടങ്ങിയ നിരവധി ചിത്രങ്ങളിൽ ശ്രുതി അഭിനയിച്ചു. അന്യഭാഷാ ചിത്രങ്ങളിലും ശ്രുതി ഇതിനോടകം അഭിനയിച്ചു കഴിഞ്ഞു.