‘നീ ഞങ്ങൾക്ക് ശരിക്കുമൊരു ഇൻസ്പിരേഷനും ഫൈറ്ററും ആയിരുന്നു’: അനന്യയുടെ മരണത്തിൽ ദുഃഖം പങ്കുവെച്ച് അഞ്ജലി അമീർ

ട്രാൻസ് ജെൻഡർ അനന്യ കുമാരി അലക്സിന്റെ മരണത്തിൽ ദുഃഖം അറിയിച്ച് നടി അഞ്ജലി അമീർ. ജീവിതത്തിൽ എല്ലാവർക്കും പ്രചോദനമായ വ്യക്തിത്വമായിരുന്നു അനന്യയുടേതെന്ന് അഞ്ജലി കുറിക്കുന്നു.

‘എന്തിനാ അനു നീ ഈ കടുംകൈ ചെയ്തത് മോളെ, നീ ശരിക്കുമൊരു ഇൻസ്പിരേഷനും ഫൈറ്ററും ആയിരുന്നു. ഞങ്ങൾക്കൊക്കെ എത്രയെത്ര സ്വപ്നങ്ങൾ നീ ഷെയർ ചെയ്തിരുന്നു. അതൊക്കെ പാതിവഴിക്കുപേക്ഷിച്ചു എന്തിനാടി നീ ഞങ്ങളെ വിട്ടുപോയെ.’–അനന്യയ്ക്കൊപ്പമുള്ള ചിത്രങ്ങൾ പങ്കുവച്ച് അഞ്ജലി അമീർ കുറിച്ചു.

ഇടപ്പള്ളി ടോൾ ജംക്‌ഷനു സമീപത്തെ ഫ്ലാറ്റിൽ തൂങ്ങി മരിച്ച നിലയിൽ ഇന്നലെയാണ് അനന്യയെ കണ്ടെത്തിയത്. ലിംഗമാറ്റ ശസ്ത്രക്രിയ നടത്തിയതിൽ പാളിച്ച പറ്റിയതിൽ മനംനൊന്ത് ആത്മഹത്യ ചെയ്തതെന്നാണ് പ്രാഥമിക നിഗമനമെന്നു പൊലീസ് പറഞ്ഞു. കേരളത്തിലെ ആദ്യത്തെ ട്രാൻസ്ജെൻഡർ ജോക്കിയായിരുന്നു അനന്യ.