ജോജു ഇങ്ങനെ വിശ്വാസവഞ്ചന കാണിക്കുമെന്ന് സ്വപ്നത്തില്‍ പോലും കരുതിയില്ല: സനല്‍കുമാര്‍ ശശിധരന്‍

നടൻ ജോജു ജോര്‍ജ് തന്നോട് വിശ്വാസ വഞ്ചന കാണിച്ചെന്നു ആരോപിച്ചു സംവിധായകന്‍ സനല്‍കുമാര്‍ ശശിധരന്‍. അന്തർദ്ദേശീയ മേളകളിൽ ശ്രദ്ധനേടിയ ചിത്രമാണ് ‘ചോല’. എന്നാൽ ഈ ചിത്രത്തിന്റെ അന്താരാഷ്ട്ര വിതരണം നിര്‍ത്തിവയ്ക്കണം എന്നാവശ്യപ്പെട്ട് ഹോങ്കോംഗ് ഇന്റര്‍നാഷണല്‍ ഫിലിം ഫെസ്റ്റിവലിന് ജോജു കത്തയച്ചു എന്നും സനല്‍കുമാര്‍ ഫേസ്‌ബുക്കില്‍ കുറിച്ചു.

കത്തില്‍ പറയുന്ന കാര്യങ്ങള്‍ ശരിയല്ല. ചിത്രത്തിന്റെ അന്താരാഷ്ട്ര വിതരണത്തിനായി ചില്ലി കാശ് പോലും ജോജുവിന്റെ കമ്പ നിയായ അപ്പു പാത്തു പപ്പു പ്രൊഡക്ഷന്‍ ഹൗസ് ചെലവാക്കിയിട്ടില്ലെന്നും തന്റെ ചിത്രങ്ങള്‍ പൂഴ്ത്തിവയ്ക്കാനുള്ള ശ്രമം നടക്കുന്നു എന്നതിന് ഒരു തെളിവാണ് ഈ കത്തെന്നും സനല്‍കുമാര്‍ ശശിധരന്‍ കുറിപ്പിൽ പറയുന്നു.

read also: പ്രഭു ദേവയുടെ കൊറിയോ​ഗ്രഫി: ഗോഡ്ഫാദർ ഗാനരംഗം ദൃശ്യവിരുന്നായിരിക്കുമെന്ന് ചിരഞ്ജീവി

കുറിപ്പ് പൂർണ്ണ രൂപം

Chola – Movie യുടെ അന്താരാഷ്ട്ര വിതരണ അവകാശത്തെ സംബന്ധിച്ച കരാർ Hong Kong International Film Festiva Society Hkiff Soc യും ആയിട്ടാണ് ഒപ്പുവെച്ചിട്ടുള്ളത്. ചോല ലോകത്തിലെ തന്നെ വളരെ പ്രധാന ഫെസ്റ്റിവലുകളിൽ ഒന്നായ വെനീസ് ഫിലിം ഫെസ്റ്റിവലിൽ പ്രിമിയർ ചെയ്യപ്പെടുകയും La Biennale di Venezia തുടർന്ന് നിരവധി ഫെസ്റ്റിവലുകളിൽ പങ്കെടുക്കുകയും ചെയ്തു. എന്നാൽ ചോല എന്ന സിനിമയുടെ കേരളത്തിലെ വിതരണം ദുരൂഹമായ നിലയിൽ അട്ടിമറിക്കപ്പെട്ടു. തമിഴിലും മലയാളത്തിലും ഒരേ സമയം റിലീസ് ചെയ്യാം എന്ന ലക്ഷ്യത്തോടെ “അല്ലി” എന്ന പേരിൽ Karthik Subbaraj ന്റെ നിർമാണപങ്കാളിത്തത്തോടെ തമിഴിൽ ചോല സെൻസർ ചെയ്യുകയും ചെയ്തു. എന്നാൽ പോടുന്നനെ കാര്യങ്ങൾ മാറി മറിഞ്ഞു. കേരളത്തിൽ റിലീസ് ചെയ്ത് ഒരാഴ്ച കഴിയും മുന്നേ സിനിമ പിൻവലിച്ചു. തമിഴിലെ റിലീസ് നടന്നില്ല.

രണ്ടു സിനിമകളിലും ജോലി ചെയ്തതിന്റെ പ്രതിഫലം എനിക്ക് കിട്ടിയിട്ടില്ല. എന്റെ ഒപ്പം ജോലിചെയ്തവർക്കും വളരെ തുച്ഛമായ പ്രതിഫലമേ കൊടുത്തുള്ളൂ. സിനിമ ജനങ്ങൾ കാണുമല്ലോ എന്ന് മാത്രമേ അതേക്കുറിച്ച് ചിന്തിച്ചിട്ടുള്ളു. എന്നാൽ ഇപ്പോൾ ചോല എന്ന സിനിമയെ ഓർമയിൽ പോലും ബാക്കി നിർത്താതെ തുടച്ചു മറ്റാനുള്ള ശ്രമങ്ങൾ നടക്കുന്നു. സിനിമ പൂർത്തിയായി ആദ്യമായി കണ്ടു കഴിഞ്ഞപ്പോൾ #jojugeorge ആണ് അത് തനിക്ക് വാങ്ങാൻ താല്പര്യമുണ്ടെന്ന് പറഞ്ഞത്. കലയോട് ഉള്ള ഇഷ്ടം കൊണ്ടാണ് അതെന്നാണ് അയാൾ എന്നെ പറഞ്ഞ് വിശ്വസിപ്പിച്ചത്. സിനിമ പ്രൊഡ്യൂസ് ചെയ്ത ഷാജി മാത്യുവിന് പണം കൊടുത്ത് അയാൾ സിനിമ വാങ്ങുമ്പോൾ എന്റെ അവകാശം കരാറിൽ ഉൾപ്പെടുത്തുകയും സിനിമയുടെ ലാഭത്തിൽ പങ്ക് തരാമെന്ന് പറഞ്ഞ് വിശ്വസിപ്പിക്കുകയും ചെയ്തു. എന്നാൽ പിന്നീട് ആ സിനിമയ്ക്ക് എന്താണ് സംഭവിച്ചത് എന്നതിൽ ഞാനുമായി ഒരു കൂടിയാലോചനയും ഉണ്ടായില്ല.

ഏറ്റവും ഒടുവിലായി സംഭവിച്ചത് സിനിമയുടെ അന്താരാഷ്ട്ര വിതരണം ഉടൻ നിർത്തിവെയ്ക്കണം എന്നാവശ്യപ്പെട്ടുകൊണ്ട് HKIFF നു വേണ്ടി വിതരണം നടത്തുന്ന @goodmovemediafilmsales ന് അയാൾ കത്തയച്ചിരിക്കുകയാണ്. അതിന് കാരണമായി കത്തിൽ പറയുന്ന കര്യങ്ങൾ ശരിയല്ല. അന്താരാഷ്ട്ര വിതരണത്തിന് ഒരു ചില്ലി കാശ് പോലും @appupathupappu_productionhouse ചെലവാക്കിയിട്ടില്ല. എന്റെ സിനിമകൾ പൂഴ്ത്തിവെയ്ക്കാനുള്ള ശ്രമം നടക്കുന്നു എന്ന എന്റെ ആരോപണങ്ങൾക്ക് ഒരു തെളിവു കൂടിയാണ് ഈ കത്ത്. ജോജു ഇങ്ങനെ വിശ്വാസവഞ്ചന കാണിക്കുമെന്ന് ഞാൻ സ്വപ്നത്തിൽ പോലും കരുതിയില്ല. ചോല മറ്റൊരാൾ വാങ്ങാൻ ശ്രമിക്കുന്നു എന്ന് ജോജുവിന്റെ സുഹൃത്തും ചോലയുടെ ഇവിടുത്തെ വിതരണം നോക്കുന്ന ആളുമായ സുരാജ് എന്നോട് പറഞ്ഞിട്ടുണ്ട്. അയാൾ എന്നോട് പറഞ്ഞ പേര് ശരിയാണെങ്കിൽ ഗൂഡാലോചന വ്യകതമാണ്.