മോഹൻ ലാലിനോടും മമ്മൂട്ടിയോടും മലയാളികൾക്കുള്ള സ്നേഹം എങ്ങനെയെന്ന് അറിയാം, ഇരുവരെയും പ്രശംസിച്ച് ഉപരാഷ്ട്രപതി

ദ്വിദിന സന്ദർശനത്തിനായി എത്തിയ ഉപരാഷ്ട്രപതി ജഗ്ദീപ് ധൻഖർ നിയമസഭാ മന്ദിരത്തിന്റെ രജതജൂബിലി ആഘോഷം ഉദ്ഘാടനം ചെയ്ത് സംസാരിക്കവേ മലയാളത്തിലെ മഹാനടൻമാരെക്കുറിച്ച് സംസാരിച്ചു.

മോഹൻലാലിനോടും മമ്മൂട്ടിയോടും തനിക്ക് മതിപ്പുണ്ടെന്ന് അദ്ദേഹം വ്യക്തമാക്കി. ഇരുവരോടും മലയാളികൾക്കുള്ള സ്നേഹം എങ്ങനെയെന്ന് അറിയാമെന്നും ഉപരാഷ്ട്രപതി ജഗ്ദീപ് ധൻഖർ പറഞ്ഞു.

രണ്ട് ദിവസത്തെ കേരള സന്ദർശനത്തിനെത്തിയ ഉപരാഷ്ട്രപതി ജഗ്ദീപ് ധൻഖർ പത്മനാഭ സ്വാമി ക്ഷേത്രത്തിൽ സന്ദർശനം നടത്തിയ ശേഷം രാജ് ഭവനിലേക്ക് പോയി. അവിടെ വച്ച് സന്ദർശകരെ കാണുകയും ​ഗവർണ്ണർ അത്താഴ വിരുന്ന് നൽകുകയും ചെയ്തു.

ഞായറാഴ്ച തിരുവനന്തപുരം വിമാനത്താവളത്തിലെത്തിയ ശ്രീ ധൻഖറിനെയും ഭാര്യ സുധേഷ് ധൻഖറിനെയും ഗവർണറും ഗതാഗത മന്ത്രി ആന്റണി രാജുവും ചേർന്നാണ് സ്വീകരിച്ചത്.

കണ്ണൂരിലെ ഏഴിമല നാവിക അക്കാദമിയിലേക്ക് പോകുന്ന ഉപരാഷ്ട്രപതി ജഗ്ദീപ് ധൻഖർ അവിടെ കേഡറ്റുകളുമായി സംവദിക്കും.

തുടർന്ന് ചിറ്റോർഗഡിലെ സൈനിക് സ്കൂളിൽ വൈസ് പ്രസിഡന്റിനെ പഠിപ്പിച്ചിരുന്ന അധ്യാപികയായ രത്‌ന നായരെ കണ്ണൂർ ജില്ലയിലെ തലശ്ശേരിക്കടുത്ത് പാനൂരിലെ ചമ്പാടിലെ വസതിയിലെത്തി ഉപരാഷ്ട്രപതി ജഗ്ദീപ് ധൻഖർ സന്ദർശിക്കും.