ന്യൂഡല്‍ഹി: അയോദ്ധ്യയില്‍ കര്‍സേവകര്‍ക്ക് നേരെ വെടിയുതിര്‍ത്ത സംഭവം വീണ്ടും ചര്‍ച്ചയാക്കി ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. രാമഭക്തര്‍ക്ക് നേരെയുണ്ടായ അയോദ്ധ്യ വെടിവെപ്പ് ഓര്‍ക്കുന്നുണ്ടോ? അന്ന് ബി.ജെ.പി സര്‍ക്കാര്‍ ഉണ്ടായിരുന്നെങ്കില്‍, ആരും അങ്ങനെ ചെയ്യാന്‍ ധൈര്യപ്പെടില്ലായിരുന്നു എന്നും ഒരു യോഗത്തില്‍ യോഗി പറഞ്ഞു.
‘രാമ ഭക്തര്‍ക്ക് നേരെ വെടിയുതിര്‍ത്തവരോട് നിങ്ങള്‍ ക്ഷമിക്കുമോ? ഇപ്പോള്‍, കേന്ദ്രത്തിലും സംസ്ഥാനത്തും ബി.ജെ.പി അധികാരത്തിലിരിക്കെ, അയോദ്ധ്യയില്‍ ഒരു മഹത്തായ രാമക്ഷേത്രം നിര്‍മ്മിക്കുന്നു, ലോകത്തിന് മുന്നില്‍ 135 കോടി ഇന്ത്യക്കാര്‍ക്ക് തല ഉയര്‍ത്തിപ്പിടിക്കാനുള്ള അവസരമാണിത്.’- യോഗി പറഞ്ഞു. വ്യാഴാഴ്ചയും 1990ലെ വെടിവയ്പ്പ് പ്രചരണ യോഗത്തില്‍ യോഗി ഉന്നയിച്ചിരുന്നു.
ലോണിയ ദളിത് സമുദായത്തിന്റെ യോഗത്തിലും യോഗി വെടിവയ്പ്പ് പ്രശ്നം ഉന്നയിച്ചിരുന്നു. സമാജികപ്രതിനിധി സമ്മേളനം എന്നാണ് ഈ ജാതി പ്രചാരണ യോഗങ്ങള്‍ക്ക് ബി.ജെ.പി പേരിട്ടിരിക്കുന്നത്. 1990 നവംബറില്‍ അയോദ്ധ്യയില്‍ നടന്ന പൊലീസ് വെടിവയ്പ്പില്‍ പതിനാറ് കര്‍സേവകര്‍ കൊല്ലപ്പെട്ടിരുന്നു. അയോദ്ധ്യ വിഷയവുമായി ബന്ധപ്പെട്ട് മരണമടഞ്ഞ കര്‍സേവകരുടെ പേരുകള്‍ റോഡുകള്‍ക്ക് നല്‍കുമെന്ന് യോഗി സര്‍ക്കാരിലെ ഉപമുഖ്യമന്ത്രി കേശവ് മൗര്യ പറഞ്ഞതായി നേരത്തെ ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്തിരുന്നു.
Post Your Comments