‘ഇന്ത്യ എല്ലാ മതങ്ങളെയും ബഹുമാനിക്കുന്നു’: സനാതന ധർമ്മത്തെ എച്ച്.ഐ.വിയോട് ഉപമിച്ച എ രാജയുടെ പരാമർശം തള്ളി പവൻ ഖേര

ചെന്നൈ: സനാതന ധര്‍മ്മത്തിനെതിരെ വിവാദ പ്രസ്താവന നടത്തിയ ഡി.എം.കെ നേതാവ് എ രാജയുടെ വാക്കുകൾ തള്ളി കോൺഗ്രസ് നേതാവ് പവൻ ഖേര. പ്രതിപക്ഷ ബ്ലോക്ക് ഇന്ത്യ എല്ലാ മതങ്ങളെയും ജാതികളെയും ബഹുമാനിക്കുന്നുണ്ടെന്ന് കോൺഗ്രസ് അവകാശപ്പെട്ടു. എ രാജ ‘സനാതന ധർമ്മ’ത്തെ എച്ച്ഐവിയോടും കുഷ്ഠരോഗത്തോടും ഉപമിച്ച് പുതിയ വിവാദം സൃഷ്ടിച്ചതിന് പിന്നാലെയാണ് പവൻ ഖേരയുടെ വിശദീകരണം. ഡി.എം.കെയുടെ എ രാജ നടത്തിയ പരാമർശത്തെ കുറിച്ച് മാധ്യമപ്രവർത്തകർ ചോദിച്ചപ്പോഴായിരുന്നു കോൺഗ്രസ് നേതാവിന്റെ പ്രതികരണം.

‘എല്ലാ മതത്തിനും എല്ലാ വിശ്വാസത്തിനും അതിന്റേതായ ഇടമുള്ള ‘സർവധർമ്മ സംഭവ’ത്തിലാണ് കോൺഗ്രസ് എപ്പോഴും വിശ്വസിക്കുന്നത്. ഒരു പ്രത്യേക വിശ്വാസത്തെ മറ്റൊന്നിനേക്കാൾ ചെറുതാക്കി ആർക്കും കാണാനാകില്ല. ഭരണഘടനയോ ഇന്ത്യൻ നാഷണൽ കോൺഗ്രസോ ഈ അഭിപ്രായങ്ങളിലൊന്നും വിശ്വസിക്കുന്നില്ല. ഞങ്ങളുടെ ഓരോ ഘടകകക്ഷികളും എല്ലാ മതങ്ങളെയും ബഹുമാനിക്കുന്നുണ്ടെന്ന് ഞങ്ങൾക്കറിയാം. ഇനി നിങ്ങൾക്ക് ആരുടെയെങ്കിലും പരാമർശങ്ങൾ വളച്ചൊടിക്കാൻ താൽപ്പര്യമുണ്ടെങ്കിൽ, അതാകാം. അതിനുള്ള സ്വാതന്ത്ര്യമുണ്ട്. പ്രധാനമന്ത്രിക്ക് അനുയോജ്യമാണെങ്കിൽ, അദ്ദേഹം ആ പരാമർശങ്ങൾ വളച്ചൊടിക്കട്ടെ. എന്നാൽ, ഇന്ത്യൻ സഖ്യത്തിലെ ഓരോ അംഗത്തിനും എല്ലാ വിശ്വാസങ്ങളോടും സമുദായങ്ങളോടും വിശ്വാസങ്ങളോടും മതങ്ങളോടും വലിയ ബഹുമാനമുണ്ട്’, പവൻ പറഞ്ഞു.

ഡി.എം.കെ നേതാവും തമിഴ്‌നാട് മന്ത്രിയുമായ ഉദയനിധി സ്റ്റാലിന്റെ ‘സനാതന ധർമ്മ’ത്തെക്കുറിച്ചുള്ള വിവാദ പരാമർശങ്ങൾക്ക് ഉചിതമായ പ്രതികരണം ആവശ്യമാണെന്ന് പ്രധാനമന്ത്രി നരേന്ദ്ര മോദി ബുധനാഴ്ച മന്ത്രിമാരുടെ കൗൺസിലിൽ പറഞ്ഞിരുന്നു. ഇതിന് പിന്നാലെയായിരുന്നു എ. രാജയുടെയും വിവാദ പരാമർശം. സനാതന ധര്‍മ്മത്തെ എച്ച്‌ഐവി, കുഷ്ഠം പോലെ സാമൂഹിക വിപത്തായ രോഗങ്ങളുമായി താരതമ്യം ചെയ്യണമെന്നും സനാതന ധര്‍മ്മത്തോടുള്ള ഉദയനിധിയുടെ സമീപനം മൃദുവായിരുന്നുവെന്നുമായിരുന്നു എ രാജ പറഞ്ഞത്.