ജയ്പൂര്‍: റിപ്പബ്ലിക് ദിനാഘോഷത്തിലെ മുഖ്യാതിഥിയായി പങ്കെടുക്കാനായി ഫ്രഞ്ച് പ്രസിഡന്റ് ഇമ്മാനുവേല്‍ മാക്രോണ്‍ ഇന്ത്യയിലെത്തി. രാജസ്ഥാനിലെ ജയ്പൂരിലെത്തിയ അദ്ദേഹത്തെ മുഖ്യമന്ത്രി ഭജന്‍ലാല്‍ ശര്‍മ്മ, വിദേശകാര്യ മന്ത്രി എസ് ജയശങ്കര്‍ എന്നിവര്‍ സ്വീകരിച്ചു. ഭാരതത്തിന്റെ 75-ാമത് റിപ്പബ്ലിക് ദിനാഘോഷത്തിലെ മുഖ്യാതിഥിയാണ് മാക്രോണ്‍.
പ്രസിദ്ധമായ ജന്തര്‍മന്തറും ഹവ മഹലും ആംബര്‍ ഫോര്‍ട്ട് അടക്കമുള്ള വിവിധ വിനോദ-സാംസ്‌കാരിക കേന്ദ്രങ്ങളില്‍ അദ്ദേഹം സന്ദര്‍ശനം നടത്തും. റിപ്പബ്ലിക് ദിനാഘോഷത്തില്‍ മുഖ്യാതിഥിയായി പങ്കെടുക്കുന്ന അഞ്ചാമത്തെ ഫ്രഞ്ച് പ്രസിഡന്റാണ് മാക്രോണ്‍.
കരകൗശല വിദഗ്ധര്‍, ഇന്‍ഡോ-ഫ്രഞ്ച് സാംസ്‌കാരിക പദ്ധതികളിലെ പങ്കാളികള്‍, വിദ്യാര്‍ത്ഥികള്‍ എന്നിവരുമായി ഇരുനേതാക്കളും സംവദിക്കും. ഇരു നേതാക്കളും ഒരുമിച്ച് പിങ്ക് സിറ്റിയില്‍ പര്യടനം നടത്തും. പ്രധാനമന്ത്രി നരേന്ദ്ര മോദിയുടെ ക്ഷണപ്രകാരമാണ് മാക്രോണ്‍ റിപ്പബ്ലിക്ക് ദിനാഘോഷത്തില്‍ പങ്കെടുക്കുന്നത്.
Post Your Comments