ഭോപ്പാല്‍ : നിക്കാഹ് ആഘോഷത്തിനിടെ നൃത്തപരിപാടി സംഘടിപ്പിച്ച കുടുംബത്തിന് പ്രാദേശിക വിലക്ക് കല്‍പ്പിച്ച് മതപുരോഹിതന്മാര്‍ . മധ്യപ്രദേശിലെ ഹര്‍ദ ജില്ലയിലെ റഷീദിന്റെ കുടുംബമാണ് പ്രാദേശിക മൗലാനമാരില്‍ നിന്നും വിലക്ക് നേരിടുന്നത്. സമൂഹത്തില്‍ നിന്ന് കുടുംബത്തെ 11 മാസമായി അകറ്റി നിര്‍ത്താനാണ് നിര്‍ദേശം. ഇതോടൊപ്പം കുടുംബത്തിന് ഒരു ലക്ഷം രൂപ പിഴയും ചുമത്തിയിട്ടുണ്ട്.
ജനുവരി 28ന് റഷീദിന്റെ വീട്ടില്‍ വച്ചായിരുന്നു ബന്ധുവായ മൊഹീനും, ചാന്ദ്‌നിയെന്ന യുവതിയും തമ്മിലുള്ള വിവാഹം. രണ്ട് ദിവസത്തിന് ശേഷം, ജനുവരി 30 ന് വിവാഹം ആഘോഷിക്കാന്‍ റഷീദ് ഒരു പാര്‍ട്ടി സംഘടിപ്പിച്ചു. ഈ വിരുന്നില്‍ റഷീദിന്റെ ബന്ധുക്കളും സുഹൃത്തുക്കളും കൂടാതെ പരിസര പ്രദേശങ്ങളില്‍ നിന്നും നിരവധി പേര്‍ പങ്കെടുത്തു. ഈ വിവാഹത്തിന് രാജസ്ഥാനി കലാകാരന്മാരെ റഷീദ് ക്ഷണിച്ചിരുന്നു. ഈ കലാകാരന്മാര്‍ക്കിടയില്‍ ഒരു വനിതാ നര്‍ത്തകിയും ഉണ്ടായിരുന്നു. ഈ നൃത്ത വീഡിയോയും സോഷ്യല്‍ മീഡിയയില്‍ വൈറലാകുകയാണ്.
വീഡിയോയില്‍ രാജസ്ഥാനിലെ പരമ്പരാഗത വസ്ത്രം ധരിച്ച് യുവതി നൃത്തം ചെയ്യുന്നത് കാണാം. എന്നാല്‍ പരിപാടി കഴിഞ്ഞപ്പോള്‍ പ്രദേശത്തെ ചില മൗലാനമാരും മുസ്ലീം സമുദായത്തിലെ മറ്റു ചിലരും ഒരുമിച്ചെത്തി . നിക്കാഹില്‍ സ്ത്രീകള്‍ നൃത്തം ചെയ്യുന്നത് ചട്ടങ്ങള്‍ക്ക് വിരുദ്ധമാണെന്ന് പറയുകയും , 11 മാസത്തേക്ക് കുടുംബത്തിന് വിലക്കേര്‍പ്പെടുത്തുകയും, പിഴ ചുമത്തുകയുമായിരുന്നു . തുടര്‍ന്ന് റഷീദ് ഇതുസംബന്ധിച്ച് പൊലീസിലും , ജില്ലാ ഭരണകൂടത്തിലും പരാതി നല്‍കി.
Post Your Comments