‘ഏകീകൃത സിവിൽ കോഡ് നടപ്പാക്കിയാൽ അത് ജനങ്ങളുടെ മതസ്വാതന്ത്ര്യം കവർന്നെടുക്കും’: അസദുദ്ദീൻ ഒവൈസി

ന്യൂഡൽഹി: രാജ്യത്ത് ഏകീകൃത സിവിൽ കോഡ് (യുസിസി) നടപ്പാക്കിയാൽ അത് ജനങ്ങളുടെ മതസ്വാതന്ത്ര്യം കവർന്നെടുക്കുമെന്ന് എഐഎംഐഎം നേതാവ് അസദുദ്ദീൻ ഒവൈസി. ആജ് തക് ജി 20 ഉച്ചകോടിയിൽ സംസാരിക്കുകയായിരുന്നു അദ്ദേഹം. യുസിസി മുഖേനയുള്ള സ്ത്രീ ശാക്തീകരണത്തെക്കുറിച്ചുള്ള ചോദ്യങ്ങൾക്ക്, കൂട്ടബലാത്സംഗത്തെ അതിജീവിച്ച ബിൽക്കിസ് ബാനോയ്ക്ക് പ്രധാനമന്ത്രി എന്തുകൊണ്ട് ഇതുവരെ നീതി നൽകിയില്ലെന്നും അദ്ദേഹം ചോദിച്ചു.

പ്രധാനമന്ത്രി നരേന്ദ്ര മോദിയെയും കോൺഗ്രസ് നേതാവ് രാഹുൽ ഗാന്ധിയെയും ഒരേ സ്വരത്തിൽ അദ്ദേഹം വിമർശിച്ചു. മോദിയെ ‘ചൗക്കിദാർ’ (കാവൽക്കാരൻ) എന്നും രാഹുൽ ഗാന്ധിയെ ‘ദുകാന്ദർ’ (കടയുടമ) എന്നും വിശേഷിപ്പിച്ചു. നരേന്ദ്ര മോദിയും രാഹുൽ ഗാന്ധിയും രാജ്യത്തെ മുസ്ലീങ്ങൾക്ക് നേരെയുള്ള അടിച്ചമർത്തലിനെക്കുറിച്ച് സംസാരിക്കുന്നില്ലെന്നും അദ്ദേഹം പറഞ്ഞു.

രാജ്യത്തെ അഴിമതി തടയുന്നതിനുള്ള പ്രതിബദ്ധതയെ പരാമർശിച്ച് പ്രധാനമന്ത്രി നരേന്ദ്ര മോദി സ്വയം ഒരു ‘ചൗക്കിദാർ’ (കാവൽക്കാരൻ) എന്ന് പലപ്പോഴും വിശേഷിപ്പിക്കാറുണ്ട്. മറുവശത്ത്, ഈ വർഷം കർണാടക നിയമസഭാ തെരഞ്ഞെടുപ്പിൽ കോൺഗ്രസ് വിജയിച്ചതിന് ശേഷമാണ് ‘മൊഹബത് കി ദുകാൻ’ എന്ന പദം രാഹുൽ ഗാന്ധിയുമായി ബന്ധപ്പെട്ടുയർന്നത്. വലിയ വിജയത്തിന് ശേഷം, ‘നഫ്രത് കി ബസാർ’ ഇപ്പോൾ സംസ്ഥാനത്ത് ചുരുട്ടിക്കൂട്ടിയിരിക്കുകയാണെന്നും അതിനുപകരം ‘മൊഹബത് കി ദുക്കാനേൻ’ തുറന്നിട്ടുണ്ടെന്നും രാഹുൽ ഗാന്ധി പറഞ്ഞിരുന്നു.

അംഗത്വം വാഗ്ദാനം ചെയ്താൽ പ്രതിപക്ഷ സഖ്യമായ ‘ഇന്ത്യ’യിൽ ചേരുമോ എന്നായിരുന്നു എഐഎംഐഎം നേതാവ് നേരിടേണ്ടി വന്ന ചോദ്യം. ഇതിന്, പ്രതിപക്ഷ ബ്ലോക്കിൽ ചേരാൻ തനിക്ക് പദ്ധതിയില്ലെന്ന് അദ്ദേഹം പറഞ്ഞു. സഖ്യത്തെ ‘അപകടകരമായ സ്നേഹം’ എന്നും അദ്ദേഹം പരാമർശിച്ചു. ഒരു വശത്ത് മെഹബൂബും മറുവശത്ത് മെഹബൂബയും ഉണ്ടായിരുന്നുവെന്നും അദ്ദേഹം പറഞ്ഞു. ബിജെപി നേതൃത്വത്തിലുള്ള ദേശീയ ജനാധിപത്യ സഖ്യത്തെ (എൻഡിഎ) മെഹബൂബ് എന്നും ഇന്ത്യൻ ബ്ലോക്കിനെ മെഹബൂബ എന്നും വിശേഷിപ്പിച്ചുകൊണ്ടായിരുന്നു അദ്ദേഹത്തിന്റെ നിരീക്ഷണം.

പ്രധാനമന്ത്രി നരേന്ദ്ര മോദിക്കെതിരായ പാർലമെന്റിലെ അവിശ്വാസ പ്രമേയത്തിൽ തന്റെ നിലപാട് വ്യക്തമാക്കിയ അദ്ദേഹം, തന്റെ പാർട്ടി പിന്തുണയ്ക്കുന്നത് ഭാരത് രാഷ്ട്ര സമിതിയുടെ അവിശ്വാസ പ്രമേയത്തെയാണെന്നും പ്രതിപക്ഷത്തെയല്ലെന്നും പറഞ്ഞു.
രാജ്യത്ത് നടക്കാനിരിക്കുന്ന ജി 20 ഉച്ചകോടിയെക്കുറിച്ച് സംസാരിക്കവേ, മറ്റ് രാജ്യങ്ങളിൽ നിന്നുള്ള ജി 20 നേതാക്കൾക്ക് മണിപ്പൂരിലെ ആഭ്യന്തരയുദ്ധം കാണിക്കുമോ എന്ന് അസദുദ്ദീൻ ഒവൈസി ചോദിച്ചു. ഉച്ചകോടിയുടെ അവസാനം സംയുക്ത പ്രസ്താവന ഇറക്കാൻ സാധ്യതയില്ലെന്നും അദ്ദേഹം പറഞ്ഞു.