വര്‍ഷങ്ങളായി മലയാള സിനിമയില്‍ നിറഞ്ഞു നിന്ന നിര്‍മാണ കമ്പനിയായിരുന്നു രേവതി കലാമന്ദിര്‍. എത്രയോ മികച്ച മലയാള സിനിമകള്‍ നമുക്ക് സമ്മാനിച്ച ഈ പ്രൊഡക്ഷന്‍ കമ്പനി ഒരു കാലത്തെ പ്രേക്ഷകരുടെ സിനിമ ഇറങ്ങും മുന്‍പേയുള്ള വലിയ വിശ്വാസങ്ങളില്‍ ഒന്നായിരുന്നു. ആറാം തമ്പുരാന്‍,കുബേരന്‍, വെട്ടം തുടങ്ങിയ ഹിറ്റ് സിനിമകള്‍ നിര്‍മിച്ച രേവതി കലാമന്ദിര്‍ പൈലറ്റ്സ്, അച്ഛനയാണെനിക്കിഷ്ടം തുടങ്ങിയ പരാജയ സിനിമകളും നിര്‍മിച്ചിട്ടുണ്ട്.
സിനിമയുടെ കഥ പറയുമ്പോള്‍ ആ സിനിമ നിര്‍മ്മിക്കണോ വേണ്ടയോ എന്നുള്ള തന്റെ അഭിപ്രായം സുരേഷ് കുമാര്‍ പരിഗണിക്കാറുണ്ടെന്ന് തുറന്നു പറയുകയാണ് നടി മേനക. പക്ഷെ താന്‍ നിര്‍മ്മിക്കരുതെന്ന് പറഞ്ഞിട്ടും ചെയ്ത ഒരേയൊരു സിനിമയാണ് ‘പൈലറ്റ്സ്’ എന്നും അതിന്റെ കഥ കേട്ടപ്പോള്‍ തന്നെ വിശ്വാസം ഉണ്ടായിരുന്നില്ലെന്നും മേനക പറയുന്നു. ബോക്സ് ഓഫീസില്‍ വലിയ പരാജയമായ പൈലറ്റ്സ് എന്ന ചിത്രം സംവിധാനം ചെയ്തത് രാജീവ്‌ അഞ്ചല്‍ ആയിരുന്നു. സുരേഷ് ഗോപി നായകനായ ചിത്രം രണ്ടായിരത്തിലാണ് പുറത്തിറങ്ങിയത്. ശ്രീനിവാസന്‍, പ്രവീണ, ഗണേഷ് കുമാര്‍, സുകുമാരി, ജഗതി ശ്രീകുമാര്‍, എന്നിവരായിരുന്നു ചിത്രത്തിലെ മറ്റു പ്രധാന താരങ്ങള്‍. രേവതി കലാമന്ദിറിന്റെ മറ്റൊരു സൂപ്പര്‍ ഹിറ്റ് ചിത്രമായ ‘ബട്ടര്‍ ഫ്ലൈസ്’ സംവിധാനം ചെയ്തതും രാജീവ്‌ അഞ്ചല്‍ ആയിരുന്നു.
Post Your Comments