‘ഒരിക്കലും മുൻകൂട്ടി പ്ലാൻ ചെയ്ത തന്ത്രവുമായി അങ്ങോട്ടേക്ക് പോകരുത്’ ; ബിഗ് ബോസിലേക്ക് പോകുന്നവർക്ക് ഉപദേശവുമായി സാബു മോൻ

ബിഗ് ബോസ് മലയാളം 2 ആരംഭിക്കാൻ ഇനി രണ്ടു ദിവസം മാത്രമാണ് ബാക്കി. ഞായർ വൈകിട്ട് 6 മണിക്കാണ് ഷോ ആരംഭിക്കുന്നത്. പരിപാടിയിൽ ആരൊക്കെയാകും പങ്കെടുക്കുക എന്ന്‌ ബിഗ് ബോസ് സംഘാടകർ അന്ന്‌ മാത്രമാകും പുറം ലോകത്തെ അറിയിക്കുക. ശേഷം ബിഗ്‌ ബോസിൽ കയറുന്ന താരങ്ങൾ പുറം ലോകവുമായി യാതൊരു ബന്ധവും ഇല്ലാതെ നൂറ് ദിവസങ്ങളാണ് ബിഗ്‌ബോസ് ഹൗസിനുള്ളിൽ കഴിയേണ്ടത്. ഇത്തരത്തിൽ നൂറ്‌ ദിവസങ്ങൾ ബിഗ് ബസിൽ കഴിച്ചു കൂട്ടി കേരളം അംഗീകരിച്ച വ്യക്തിത്വമായിരുന്നു സാബുമോൻ അബ്ദുസ്സമദിന്റേത്.

ഒന്നാം സ്ഥാനക്കാരനായി എത്തിയ സാബുമോന് ഒരു കോടിയുടെ വില്ലയാണ് സമ്മാനമായി ലഭിച്ചത്. എന്നാൽ ഒരു കോടിയേക്കാളും തനിക്ക് ബിഗ് ബോസ് സമ്മാനിച്ചത് ഒരുപാട് സൗഹൃദങ്ങളും, സന്തോഷവുമായിരുന്നെന്ന് സാബുമോൻ മുൻപ് തന്നെ വ്യക്തമാക്കിയിരുന്നു. ഇത്തവണ പങ്കെടുക്കാൻ പോകുന്നവർക്ക് ഒരു ഉപദേശമാണ് താരം നൽകുന്നത്. ടൈംസ് ഓഫ് ഇന്ത്യ ഓൺലൈന് നൽകിയ അഭിമുഖത്തിലാണ് താരം ഉപദേശം നൽകുന്നത്.

ഒരിക്കലും മുൻകൂട്ടി പ്ലാൻ ചെയ്ത ഒരു തന്ത്രവുമായി അങ്ങോട്ടേക്ക് പോകരുത്, അത് ഒരിക്കലും അവിടെ വർക്ക്ഔട്ട് ആകില്ല എന്നാണ് താരം വ്യക്തമാക്കുന്നത്. മാത്രമല്ല ഷോ വിജയിക്കണം എന്ന മനസ്സോടെയാകരുത് അവിടേക്ക് ചെല്ലാൻ. നമ്മൾ പുതിയ ഒരു അന്തരീക്ഷത്തിലേക്ക് ആണ് പോകുന്നത്, അപ്പോൾ ആ മനസ്സോടെയാകണം ഷോയിലേക്ക് പ്രവേശിക്കാൻ. അവിടെ അപരിചിതരായ ആളുകൾ ആകും ഉണ്ടാവുക, അവരോടൊപ്പം ജീവിക്കാനും, മനസ്സിലാക്കാനും, പ്രാപ്തമായ മനസ്സോടെ വേണം അവിടേക്ക് കടക്കാനെന്നും അദ്ദേഹം കൂട്ടിച്ചേർത്തു.

തന്നെ സംബന്ധിച്ചിടത്തോളം ബിഗ് ബോസ് ജീവിതത്തിൽ വലിയ ഒരു അനുഭവമാണ് സമ്മാനിച്ചത്. അതിനെ നമ്മുടെ ദൈനം ദിന ജീവിതവുമായി താരതമ്യം ചെയ്യാൻ കഴിയില്ല. എനിക്ക് മറക്കാൻ ആകാത്ത ഒരുപാട് ഓർമ്മകളും, സുഹൃത്തുക്കളെയും ലഭിച്ചത് ബിഗ് ബോസിൽ നിന്നുമാണെന്നും താരം അഭിപ്രയപെട്ടു.