മഞ്ജു പത്രോസിന്റയെ പ്രവചനം ഫലിച്ചു ; രാജിനി ചാണ്ടി ബിഗ് ബോസ് വീടിന് പുറത്തേക്ക്

ബിഗ് ബോസ് രണ്ടാം സീസണിലെ ആദ്യ എലിമിനേഷന്‍ ഏറെ ആകാംഷ നിറഞ്ഞതായിരുന്നു.
രജിത്, സുജോ, അലക്‌സാന്‍ഡ്ര, എലീന, സോമദാസ്, രാജിനി എന്നിങ്ങനെ ആറ് പേരാണ് നോമിനേഷനില്‍  ഉണ്ടായിരുന്നത്. കളിയറിഞ്ഞു കളിച്ചുവരുന്നതിന് മുമ്പേയുള്ള എലിമിനേഷന്‍ ആയതിനാല്‍ കിട്ടിയ അവസരം ഉപയോഗിക്കാന്‍ ആകാതെപോയതിന്റെ നിരാശ ഇവരിലുണ്ടായിരുന്നു. പുറത്ത് കാണിച്ചില്ലെങ്കിലും ടെന്‍ഷനുണ്ടായിരുന്നു ആറും പേരും.

ആരാണ് വിടപറയുന്നതെന്ന അങ്കലാപ്പ് സേഫായി ഇരിക്കുന്ന ബാക്കി 11 പേരിലും ഉണ്ടായിരുന്നു. എന്നാല്‍ ആദ്യ വിധിയെഴുത്ത് ദിനത്തിലെ ഏറ്റവും വലിയ പണി കിട്ടിയത് ഈ 11 പേര്‍ക്കുതന്നെ. നോമിനേഷനില്‍ ഉള്ളവരില്‍ ആരായിരിക്കും പുറത്തുപോകാന്‍ സാധ്യതയുളളതെന്ന് പ്രവചിക്കണം. തുറന്നമുറിയില്‍ ബാക്കി 16 പേരു ഏറ്റവുമധികം കേട്ടത് ഗായകന്‍ സോമദാസിന്റെ പേരായിരുന്നു. പതിനൊന്നില്‍ പത്ത് പേരും സോമദാസ് പുറത്താകുമെന്ന് പ്രവചിച്ചു. അനാരോഗ്യവും വീട്ടിലുള്ളവരെ കുറിച്ചുള്ള ചിന്തയുമൊക്കെയാണ് സോമദാസിനെ കളിയില്‍ പിന്നോട്ടടിക്കുന്നതെന്ന് അവര്‍ അഭിപ്രായപ്പെട്ടു.

എല്ലാവരും സോമദാസിന്റെ പേര് പറഞ്ഞപ്പോള്‍ നടി മഞ്ജു പത്രോസ് മാത്രം വേറിട്ടു നിന്നു. മഞ്ജുവിന്റെ കണക്കുകൂട്ടലില്‍ സോമദാസ് ആയിരുന്നില്ല പുറത്തുപോകുന്നത്. എപ്പോഴും തന്റെ മാപ്പിളയുടെ അടുത്തേക്ക് പോകണം എന്ന് പറയുന്ന രാജിനി ചാണ്ടി പുറത്തുപോകുമെന്നായിരുന്നു മഞ്ജുവിന്റെ പ്രവചനം. ബിഗ് ബോസ് മല്‍സരാര്‍ത്ഥികളില്‍ എലിമിനേഷനെക്കുറിച്ച് ശരിയായ പ്രവചനം നടത്തിയ ഒരേയൊരു വ്യക്തി മഞ്ജുവാണ്. രജിത്തും സുജോയും എലീനയും അലക്‌സാന്‍ഡ്രയും സോമദാസും സേഫ് എന്ന വാര്‍ത്ത കേട്ട് സന്തോഷിച്ചപ്പോള്‍ രാജിനി ചാണ്ടിക്ക് മുന്നിലാണ് പുറത്തേക്കുള്ള വാതില്‍ തുറന്നുകിട്ടിയത്.