ആ വള്‍ഗര്‍ സീനില്‍ അഭിനയിക്കില്ലെന്ന് തീര്‍ത്തുപറഞ്ഞു, മറ്റൊരു നടനാണ് അത് ചെയ്തത് ; തുറന്നുപറഞ്ഞ് സലിം കുമാർ

എക്കാലത്തും പ്രേക്ഷകരെ പൊട്ടിച്ചരിപ്പിക്കുന്ന ചിത്രമാണ് ‘ബാംബു ബോയ്‌സ്’. സലിം കുമാർ, കലാഭവൻ മണി, നാദിർഷ തുടങ്ങി നിരവധി കലാകാരന്മാർ അണിനിരന്ന സിനിമ ഇന്നും പ്രേക്ഷകർക്ക് പ്രിയങ്കരമാണ്. ഇപ്പോഴിതാ സിനിമയിലെ ഒരു വൾഗർ സീനിൽ
താന്‍ അഭിനയിക്കില്ലെന്ന് സിനിമയുടെ സംവിധായകന്‍ അലി അക്ബറിനോട് തുറന്നുപറയേണ്ടി വന്നുവെന്ന് വെളിപ്പെടുത്തിയിരിക്കുകയാണ് സലിം കുമാര്‍. തനിക്ക് പകരം ആ ഷോട്ട് വേറെ ഒരു നടനെ വെച്ചു എടുത്തുവെന്നും അദ്ദേഹം മാധ്യമം ആഴ്ചപ്പതിപ്പിന് നല്‍കിയ അഭിമുഖത്തില്‍ പറഞ്ഞു.

സലിം കുമാറിന്റെ വാക്കുകൾ

”സത്യസന്ധമായി മറുപടി പറയാം. ആ സിനിമയില്‍ ഐസ് ക്രീം കഴിക്കുന്ന ഒരു സംഭവം ഉണ്ട്. അത് ഞാന്‍ ആയിരുന്നു ചെയ്യേണ്ടിയിരുന്നത്. അത് ഞാന്‍ ചെയ്യില്ല എന്നു പറഞ്ഞു. ഐസ് ക്രീം കഴിക്കുന്നതും വെളിക്കിരിക്കുന്നതുമെല്ലാം കൂടെ ലിങ്ക് ചെയ്ത ഒരു വള്‍ഗര്‍ സീന്‍. ഞാന്‍ ചെയ്യില്ല എന്നു പറഞ്ഞു. അധിക്ഷേപം ഉണ്ട്. ഞാന്‍ അതിനെ എതിര്‍ത്തു. പക്ഷേ ആ ഷോട്ട് വേറെ ഒരു നടനെ വെച്ചു എടുത്തു. ഞാന്‍ നിന്നില്ല. പക്ഷേ ഒരു നടന് ലിമിറ്റേഷന്‍സ് ഉണ്ട്. നടന്‍ വെറും ടൂള്‍ മാത്രമാണ്. നടന്‍ ഒരു കാര്യം അഭിനയിച്ചില്ലെങ്കില്‍ പൈസ വാങ്ങിച്ചുകൊണ്ട് ഷൂട്ടിങ് തടസ്സപ്പെടുത്തി എന്നു പറഞ്ഞ് നിയമപരമായി നടപടി എടുക്കാം. നടന്റെ ചെറുത്തുനില്‍പ്പുകള്‍ക്ക് ഒരു പരിധിയുണ്ട്”. സലിം കുമാർ പറഞ്ഞു.