‘ഇത് ഞങ്ങളുടെ ഒരുമിച്ചുള്ള അവസാന ചിത്രമായിരിക്കുമെന്ന് കരുതിയില്ല, ചേച്ചിയമ്മ പോയി’: ചന്ദ്ര ലക്ഷ്മൺ

സിനിമ, സീരിയൽ താരം രശ്മി ഗോപാലിന്റെ അകാല വിയോ​ഗത്തിന്റെ ഞെട്ടലിലാണ് ചലച്ചിത്ര ലോകം. ആരോഗ്യപ്രശ്‌നങ്ങളെ തുടർന്ന് ആശുപത്രിയിൽ ചികിത്സയിലിരിക്കെ ഞായറാഴ്ച രാത്രിയോടെയാണ് രശ്മി മരിച്ചത്. സ്വന്തം സുജാത എന്ന സീരിയയിലെ സാറാമ്മ എന്ന കഥാപാത്രത്തിലൂടെയാണ് രശ്മി ഗോപാൽ ശ്രദ്ധേയയായത്.

ഇപ്പോളിതാ, രശ്മിയുടെ മരണത്തിൽ അനുശോചനം അറിയിച്ച് എത്തിയിരിക്കുകയാണ് നടി ചന്ദ്ര ലക്ഷ്മൺ. ഞങ്ങളുടെ ഏറ്റവും പ്രധാനപ്പെട്ട ഒരു കുടുംബാംഗത്തെ ഞങ്ങൾക്ക് നഷ്ടപ്പെട്ടു എന്നാണ് ചന്ദ്ര ഇൻസ്റ്റ​ഗ്രാമിൽ കുറിച്ചത്. രശ്മിയോടൊപ്പമുള്ള ചിത്രവും ചന്ദ്ര പങ്കുവച്ചിട്ടുണ്ട്.

Also Read: നടി രശ്മി ​ഗോപാൽ അന്തരിച്ചു: അനുശോചനം അറിയിച്ച് താരങ്ങൾ

ചന്ദ്ര ലക്ഷ്മൺ സമൂഹ മാധ്യമത്തിൽ പങ്കുവച്ച കുറിപ്പ് വായിക്കാം:

ഇത് ഞങ്ങളുടെ ഒരുമിച്ചുള്ള അവസാന ചിത്രമായിരിക്കുമെന്ന് എന്റെ വിചിത്രമായ സ്വപ്നത്തിൽ പോലും ഞാൻ കരുതിയിരുന്നില്ല… ഞങ്ങളുടെ പ്രിയപ്പെട്ട രശ്മി ചേച്ചീ, എന്റെ ചേച്ചിമ്മ എന്നെന്നേക്കുമായി അവരുടെ കൃഷ്ണനോടൊപ്പം ഉണ്ടായിരിക്കാൻ പോയി. അവർ സ്നേഹത്തിന്റെ പ്രതിരൂപമാണ്, അവരുടെ കരുതലോടെ എല്ലാവരുടെയും ജീവിതത്തെ സ്പർശിച്ചു…ഇന്ന് നമുക്ക് അവരെ നഷ്ടപ്പെട്ടു, അവരുടെ സാന്നിധ്യമില്ലാതെ ഷൂട്ടിങ് സ്പോട്ടിൽ കഴിയുന്നത് ചിന്തിക്കുന്നത് ഞങ്ങൾക്കെല്ലാവർക്കും വളരെ ബുദ്ധിമുട്ടാണ്. സ്വന്തം സുജാതയിലെ എല്ലാവരും അവരെ മിസ് ചെയ്യും. വ്യക്തിപരമായി നോക്കുമ്പോൾ, ഞങ്ങളുടെ ഏറ്റവും പ്രധാനപ്പെട്ട ഒരു കുടുംബാംഗത്തെ ഞങ്ങൾക്ക് നഷ്ടപ്പെട്ടു.