സന്ദീപ് വാര്യര്‍ കേരളം വിടുന്നു, ഇനി തമിഴ്‌നാടിനായി കളത്തിലിറങ്ങും

കൊച്ചി: കേരളത്തിന്റെ സ്റ്റാര്‍ പേസര്‍ സന്ദീപ് വാര്യര്‍ ടീം വിടുന്നതായി സ്ഥിരീകരണം. അടുത്ത രഞ്ജി ട്രോഫി സീസണ്‍ മുതല്‍ തമിഴ്നാടിനായാണ് സന്ദീപ് കളത്തിലിറങ്ങുക. 2018-19 സീസണില്‍ ചരിത്രത്തിലാദ്യമായി കേരളം രഞ്ജി ട്രോഫി സെമിയിലെത്തിയപ്പോള്‍ സന്ദീപ് ആയിരുന്നു വിക്കറ്റ് വേട്ടയില്‍ മുന്നില്‍. കേരളത്തിന്റെ ഈ മിന്നല്‍ ബൗളര്‍ ഇനി തമിഴ്‌നാടിനായിയാണ് കളത്തിലിറങ്ങുക എന്നാണ് പുറത്തുവരുന്ന റിപ്പോര്‍ട്ട്.

ഫസ്റ്റ് ക്ലാസില്‍ 57 മല്‍സരങ്ങളില്‍ നിന്ന് 24.43 ശരാശരിയില്‍ 186 വിക്കറ്റുകളും 55 ലിസ്റ്റ് എ മല്‍സരങ്ങളില്‍ നിന്നും 66 വിക്കറ്റുകളും 47 ടി20കളില്‍ നിന്നും 7.2 എന്ന മികച്ച ഇക്കോണമി റേറ്റില്‍ 46 വിക്കറ്റുകളും സന്ദീപ് വീഴ്ത്തിയിട്ടുണ്ട്. ഫസ്റ്റ് ക്ലാസില്‍ 11 തവണ അഞ്ചു വിക്കറ്റ് നേട്ടവും സന്ദീപ് നേടി. ഇന്ത്യ സിമന്റ്സ് ജീവനക്കാരനായ സന്ദീപ് ചെന്നൈയിലാണ് പരിശീലനം നടത്താറുള്ളത്. ഐപിഎല്ലിലെ കൊല്‍ക്കത്ത നൈറ്റ് റൈഡേഴ്സിന്റെ താരമാണ് സന്ദീപ്.