ദേവരഥങ്ങൾ സംഗമിച്ചു. കൽപ്പാത്തിയിലെ അഗ്രഹാര തെരുവിൽ രഥോസൽസവം കൊടിയിറങ്ങി

കൽപ്പാത്തിയുടെ അഗ്രഹാര തെരുവുകൾ മന്ത്രജപത്താൽ മുഖരിതമായി ദേവരഥങ്ങൾ സംഗമിച്ചു. കൽപ്പാത്തിയിലെ അഗ്രഹാര തെരുവിൽ രഥോസൽസവത്തിന് കൊടിയിറങ്ങി. ആയിരത്തിലധികം ഭക്തരെ നിർവൃതിയിലാക്കി നടന്ന ദേവരഥസംഗമത്തിൽ അഞ്ചുരഥങ്ങളാണ് അണിനിരന്നത്. ദേവഗണങ്ങളെ വഹിച്ചുകൊണ്ടുളള രഥങ്ങളെ തൊട്ടുവണങ്ങിയും തേര് വലിച്ചുനീക്കിയും ഭക്തർ നിർവൃതിയടഞ്ഞു.

കേരളത്തിലെ പാലക്കാട് ജില്ലയിലുള്ള കൽ‌പാത്തി ഗ്രാമത്തിലെ ക്ഷേത്രത്തിൽ എല്ലാ വർഷവും നടക്കുന്ന ഒരു ഉത്സവമാണ് കൽപ്പാത്തി രഥോത്സവം. ശ്രീ വിശാലാക്ഷി സമേത ശ്രീ വിശ്വനാഥസ്വാമി ക്ഷേത്രത്തിലാണ് രഥോത്സവം നടക്കുന്നത്. ഈ ക്ഷേത്രത്തിലെ പ്രധാന പ്രതിഷ്ഠകൾ വിശ്വനാഥപ്രഭുവും (പരമശിവൻ) അദ്ദേഹത്തിന്റെ പത്നിയായ വിശാലാക്ഷിയും (പാർവ്വതി) ആണ്.
എല്ലാ വർഷവും നടത്തുന്ന പത്തുദിവസത്തെ രഥോത്സവം നവംബർ മാസത്തിലാണ് (മലയാള മാസം തുലാം 28,29,30) നടക്കുക. കേരളത്തിലെ ഏറ്റവും ആകർഷകമായ ഉത്സവങ്ങളിൽ ഒന്നാണ് ഇത്. വേദ പാരായണവും കലാ സാംസ്കാരിക പരിപാടികളും ഈ ഉത്സവത്തിന്റെ ആദ്യത്തെ നാലുദിവസം ക്ഷേത്രത്തിൽ നടക്കുന്നു. ക്ഷേത്രത്തിന് 700 വർഷത്തോളം പഴക്കം ഉണ്ടെന്നു കരുതുന്നു. അവസാനത്തെ മൂന്നുദിവസം അലങ്കരിച്ച രഥം തെരുവുകളിലൂടെ ക്ഷേത്രത്തിലേക്ക് വലിക്കുവാനായി ആയിരക്കണക്കിന് ഭക്തജനങ്ങൾ എത്തിച്ചേരുന്നു.