ഈ വിജയം നേടാൻ അർഹതയുള്ളവളാണ് ഞാനെന്ന് ഉറച്ചു വിശ്വസിക്കുന്നു: പ്രതികരണവുമായി ദിൽഷ

ബിഗ് ബോസ് സീസൺ നാലിന്റെ ടൈറ്റിൽ വിന്നർ ആയതിന് ശേഷം ആദ്യമായി സമൂഹ മാധ്യമങ്ങളിലൂടെ പ്രതികരിച്ച് ദിൽഷ പ്രസന്നൻ. ബിഗ് ബോസ് മലയാളം ചരിത്രത്തിൽ ആദ്യമായാണ് ഒരു പെൺകുട്ടി ടൈറ്റിൽ വിജയിയാവുന്നത്. 20 മത്സരാർത്ഥികളാണ് ഈ സീസണിൽ മാറ്റുരച്ചത്. തീർത്തും അപ്രതീക്ഷിതമായിട്ടായിരുന്നു ദിൽഷയുടെ വിജയം.

അതേസമയം, ബി​ഗ് ബോസ് കിരീടം ചൂടാൻ ദിൽഷ യോ​ഗ്യയല്ലെന്ന് പറഞ്ഞ് നിരവധി പേര് രംഗത്ത് എത്തിയിരുന്നത്. സഹ മത്സരാർത്ഥികൾ ഉൾപ്പെടെ ഉള്ളവർ ഇതേ അഭിപ്രായം പങ്കുവച്ചിരുന്നു. ഇതിന് പിന്നാലെയാണ് പ്രതികരണവുമായി ​ദിൽഷ എത്തിയിരിക്കുന്നത്. ഇൻസ്റ്റാ​ഗ്രാമിലൂടെ ആയിരുന്നു ദിൽഷയുടെ പ്രതികരണം.

ദിൽഷയുടെ വാക്കുകൾ:

എന്നെ സപ്പോർട്ട് ചെയ്തവർക്ക് നന്ദി. എന്നെ സ്നേഹിക്കുന്ന ഒരുപാട് പേരുണ്ടെന്ന് എനിക്ക് മനസ്സിലായി. നിങ്ങളുടെ കമന്റുകൾ എന്നെ ഒരുപാട് സന്തോഷിപ്പിച്ചു. ചില ചീത്ത കമന്റ്സും ഞാൻ കണ്ടിട്ടുണ്ട്. ഈ ഡ്രിഗ്രേഡിംഗും കാര്യങ്ങളുമൊക്കെയുണ്ടാവും, ഇത്രയും വലിയ ഷോയല്ലേ. രണ്ടും അഭിമുഖീകരിക്കേണ്ടി വരുമെന്ന് എനിക്കറിയാം. ഞാൻ അതിന്റേതായ രീതിയിൽ മാത്രമേ എടുത്തിട്ടുള്ളൂ. കുറച്ച് വിഷമമൊക്കെ ഉണ്ടായിരുന്നെങ്കിലും ഞാനിപ്പോൾ ഓക്കെയാണ്. ഞാൻ ഇത് അർഹിക്കുന്നില്ല എന്നു ചിലർ പറയുന്നു. പക്ഷേ, ഞാനിപ്പോഴും വിശ്വസിക്കുന്നു ഈ വിജയം നേടാൻ അർഹതയുള്ളവളാണ് ഞാനെന്ന്. 100 ദിവസവും ഞാനെന്റെ 100 ശതമാനം കൊടുത്തിട്ടാണ് അവിടെ നിന്നത്.