കൊച്ചിയിൽ നടന്ന താരസംഘടനയായ ‘അമ്മ’ ജനറൽ ബോഡി യോഗത്തിനിടെ 64-ാം പിറന്നാൾ ആഘോഷിച്ച് നടൻ സുരേഷ് ഗോപി. മോഹൻലാലും മമ്മൂട്ടിയുമടക്കം പ്രമുഖ താരങ്ങളുടെ സാന്നിദ്ധ്യത്തിൽ കേക്ക് മുറിച്ചായിരുന്നു ആഘോഷം. വർഷങ്ങൾക്ക് ശേഷം ‘അമ്മ’യിലേയ്‌ക്ക് തിരിച്ചെത്തിയ സുരേഷ് ഗോപിയ്‌ക്ക് സംഘടന നൽകിയ വരവേൽപ്പ് ഏറെ ശ്രദ്ധിക്കപ്പെട്ടിരുന്നു. ഇപ്പോൾ താരത്തിന്റെ പിറന്നാൾ ആഘോഷവും ആരാധകർ ഏറ്റെടുത്തിരിക്കുകയാണ്. കുടുംബസമേതമാണ് സുരേഷ് ഗോപി യോഗത്തിൽ പങ്കെടുക്കാനെത്തിയത്. പിറന്നാൾ ആഘോഷത്തിന്റെ ചിത്രങ്ങളും വീഡിയോകളും സുരേഷ് ഗോപി സമൂഹ മാധ്യമങ്ങളിൽ പങ്കുവച്ചിരുന്നു. മണിക്കൂറുകൾക്കകം തന്നെ ഇത് വൈറലായി കഴിഞ്ഞു.
മലയാള സിനിമയിലെ താരങ്ങൾ സുരേഷ് ഗോപിയ്‌ക്ക് ആശംസകൾ നേർന്ന് രാവിലെ മുതൽ രംഗത്ത് വന്നിരുന്നു. രാഷ്ട്രീയത്തിൽ സജീവമായതോടെ ഇടയ്ക്ക് സുരേഷ് ഗോപി സിനിമയിൽ നിന്ന് ഇടവേളയെടുത്തിരുന്നു. ഇപ്പോൾ അഭിനയ രംഗത്ത് താരം വീണ്ടും സജീവമാകുന്നതിന്റെ സന്തോഷവും ആശംസകൾക്കൊപ്പം ആരാധകർ പങ്കുവയ്ക്കുന്നുണ്ട്.
Also Read: പൊലീസ് വേഷത്തിൽ സൗബിൻ: ആകാംക്ഷയുണർത്തി ‘ഇലവീഴാപൂഞ്ചിറ’യുടെ ട്രെയ്‍ലർ
അഞ്ച് വർഷത്തോളം നീണ്ട ഇടവേളയ്ക്കു ശേഷം അനൂപ് സത്യൻ സംവിധാനം ചെയ്ത വരനെ ആവശ്യമുണ്ട് എന്ന ചിത്രത്തിലൂടെ 2020ലാണ് സുരേഷ് ഗോപി തിരികെയെത്തിയത്. പിന്നീട് താരത്തെ തേടി നിരവധി ചിത്രങ്ങളെത്തി. ജോഷി- സുരേഷ് ഗോപി കൂട്ടുകെട്ടിലുള്ള പാപ്പനാണ് ഉടനെ തിയേറ്ററിൽ എത്തുന്ന ചിത്രം.
Post Your Comments