വിക്രമിൽ ഡില്ലിയുടെ മുഖം കാണിക്കാത്തതിന് പിന്നിലെ രഹസ്യം ഇതാണ്: കാർത്തി പറയുന്നു

കമൽ ഹാസനെ കേന്ദ്ര കഥാപാത്രമാക്കി ലോകേഷ് കനകരാജ് ഒരുക്കിയ ചിത്രമായിരുന്നു വിക്രം. സിനിമയിൽ കാർത്തിയെ നായകനാക്കി ലോകേഷ് സംവിധാനം ചെയ്ത കൈ​​ദിയിലെ ചില രം​ഗങ്ങളും ഉൾപ്പെടുത്തിയിരുന്നു. ഡില്ലി എന്ന കഥാപാത്രമായിട്ടായിരുന്നു കൈദിയിൽ കാർത്തി എത്തിയത്. എന്നാൽ, വിക്രമിൽ ഡില്ലിയുടെ ശബ്ദം മാത്രമാണ് ഉപയോ​ഗിച്ചിരുന്നത്. ഇപ്പോളിതാ, വിക്രമിൽ ഡില്ലിയുടെ മുഖം കാണിക്കാത്തതിന്റെ കാരണം വെളിപ്പെടുത്തുകയാണ് കാർത്തി. വിരുമൻ ചിത്രത്തിന്റെ പ്രൊമോഷന്റെ ഭാ​ഗമായി തിരുവനന്തപുരത്ത് വെച്ച് ന‌ടന്ന വാർത്താസമ്മേളനത്തിലാണ് താരം ഇക്കാര്യങ്ങൾ പറയുന്നത്.

Also Read: അമലാ പോളിന്റെ ‘കാടവെര്‍’ റിലീസിനൊരുങ്ങുന്നു: തിയതി പുറത്ത്

കാർത്തിയുടെ വാക്കുകൾ:

ഡില്ലി എന്ന കഥാപാത്രത്തിന് അത്രയേറെ സ്നേഹം ലഭിച്ചു. നമുക്ക് സ്നേഹം ലഭിക്കുക എന്ന് പറയുന്നത് ഇഷ്ടമുള്ള കാര്യമാണ്. ആ സ്നേഹം നിങ്ങളിൽ നിന്ന് കിട്ടുമ്പോൾ അതിയായ സന്തോഷമുണ്ട്. സിനിമ ഇറങ്ങി നാല് വർഷം ആയി എന്നിട്ടും ഇപ്പോഴും എല്ലാവരും ചോദിക്കുന്നത് എപ്പോൾ കൈദി 2 ഇറങ്ങും എന്നാണ്. അത് കേൾക്കുമ്പോൾ നിറഞ്ഞ സന്തോഷം.

വിക്രമിൽ ഡില്ലിയുടെ മുഖം കാണിക്കാത്തത് എന്താണെന്ന് പലരും ചോദിച്ചു. വിക്രം സിനിമയുടെ ചിത്രീകരണ സമയത്ത് ഞാൻ പൊന്നിയിൻ സെൽവന് വേണ്ടി മുടി നീട്ടി വളർത്തിയിരിക്കുകയായിരുന്നു. അതിന് ശേഷം സർ​ദാർ എന്ന ചിത്രത്തിന് വേണ്ടി ഷേവ് ചെയ്തിരുന്നതിനാൽ പഴയ ലുക്കിൽ പോയി വീണ്ടും ഡില്ലിയായി വരാനുള്ള ചാൻസ് ഇല്ലായിരുന്നു. അതാണ് വോയിസ് മാത്രം ചെയ്തത്. ഡില്ലിയെ കാണാൻ കുറച്ച് കാത്തിരിക്കൂ. എല്ലാ കഥാപാത്രത്തേയും വിക്രമിൽ തന്നെ കണ്ടാൽ അതിനപ്പുറം എന്ത് കാണും.