സിനിമയ്ക്ക് പുറത്തും സിദ്ധിഖ് ലാല്‍ ടീം അവരുടെ സൗഹൃദം അമൂല്യതയോടെ കാത്ത് സൂക്ഷിക്കുന്നവരാണ്. ജീവിതത്തില്‍ സിദ്ധിഖിനോട് നന്ദി പറയേണ്ട ഏറ്റവും മനോഹരമായ നിമിഷം ഓര്‍ത്തെടുക്കുകയാണ് സംവിധായകനും നടനുമായ ലാല്‍.
ലാലിന്‍റെ വാക്കുകള്‍
‘ ‘റാംജിറാവ്‌ സ്പീക്കിംഗ്’ എന്ന ചിത്രമൊക്കെ കഴിഞ്ഞു നില്‍ക്കുമ്പോഴായിരുന്നു സഹോദരിയുടെ വിവാഹം. വിവാഹത്തിന് ചെലവുകള്‍ ഉള്ളതിനാല്‍ അന്ന് സാമ്പത്തികമായി കുറച്ചു ബുദ്ധിമുട്ട് ഉണ്ടായിരുന്നു. പോരാത്തതിന് സഹോദരിയുടെ കയ്യില്‍ കിടന്ന ഒരു ബ്രേസ്ലെറ്റും എങ്ങനെയോ നഷ്ടപ്പെട്ടു. അതോടെ മാനസികമായി വല്ലാതെ വിഷമിച്ചിരുന്നു. അന്ന് ഞാനും സിദ്ധിഖും അടുത്ത സിനിമയുടെ എഴുത്തൊക്കെ ചെറുതായി തുടങ്ങിയിരുന്നു. സഹോദരിയുടെ വിവാഹ ചെലവ് എങ്ങനെ മുന്നോട്ടു കൊണ്ട് പോകുമെന്ന് ആലോചിച്ച് വീട്ടില്‍ ദുഖിച്ച് ഇരിക്കുമ്പോള്‍ സിദ്ധിഖ് വരുന്നു. ‘സഹോദരിയുടെ വിവാഹമൊക്കെയല്ലേ ഈ പൈസ ഇരിക്കട്ടെ’ എന്ന് പറഞ്ഞു സിദ്ധിഖ് എന്റെ കയ്യില്‍ ഒരു പൊതി തന്നു. ജീവിതത്തില്‍ ഒരിക്കലും ഇത്രയും കണ്ണ് നിറഞ്ഞു പോയ ഒരു നിമിഷം എനിക്ക് ഉണ്ടായിട്ടില്ല. അന്ന് സിദ്ധിഖിനോട് നന്ദി പറയാന്‍ എനിക്ക് ആയില്ല. പിന്നീട് ആ കടപ്പാട് ഞാന്‍ സിദ്ധി ഖിനോട് തുറന്നു പറഞ്ഞിട്ടുണ്ട്. ഒരു ടിവി ഷോയ്ക്ക് നല്‍കിയ അഭിമുഖത്തിലായിരുന്നു സിദ്ധിഖിനോട് വലിയ കടപ്പാട് തോന്നിയ നിമിഷത്തെക്കുറിച്ച് ലാല്‍ പങ്കുവെച്ചത്.
Post Your Comments