കണ്ണമ്മയ്ക്ക് ശേഷം നല്ല കഥാപാത്രങ്ങള്‍ കിട്ടുമെന്ന് പ്രതീക്ഷിച്ചു, എന്നാൽ ? മനസ് തുറന്ന് ഗൗരി നന്ദ

ചെറുതും വലുതുമായി നിരവധി ചിത്രങ്ങൾ ചെയ്തിട്ടുണ്ടെങ്കിലും അയ്യപ്പനും കോശിയും എന്ന ചിത്രത്തിലെ കണ്ണമ്മ എന്ന കഥാപാത്രത്തിലൂടെയാണ് ഗൗരി നന്ദ ശ്രദ്ധിക്കപ്പെടുന്നത്. ബിജുമേനോന്റെ ഭാര്യയായെത്തി ഗംഭീര പ്രകടനമാണ് ചിത്രത്തിൽ കാഴ്ചവെച്ചത്. ചിത്രം ഗംഭീര വിജയം കൈവരിച്ചതോടെ ഇനിയും മികച്ച കഥാപാത്രങ്ങൾ കിട്ടുമെന്ന് പ്രതീക്ഷിച്ചിരുന്നുവെന്നും, എന്നാൽ ആകസ്മികമായി കോവിഡ് വന്നതോടെ എല്ലാ പ്രതീക്ഷയും അവതാളത്തിലായി എന്ന് പറയുകയാണ് ഗൗരി നന്ദ.
ഒരു മാഗസിന് അനുവദിച്ച അഭിമുഖത്തിലാണ് ഗൗരി നന്ദ ഇക്കാര്യം തുറന്നു പറഞ്ഞത്.

ഗൗരി നന്ദയുടെ വാക്കുകള്‍

, ‘പല സിനിമകളും അതോടെ നീണ്ടുപോയി. എന്നാലും എനിക്ക് അതിലൊന്നും സങ്കടമില്ല. ലോകത്തെ മുഴുവന്‍ ജനങ്ങളും ഇതുപോലുള്ള പ്രതിസന്ധികള്‍ കൊവിഡ് കാലത്ത് നേരിട്ടിട്ടുണ്ട്. ഇപ്പോള്‍ പുതിയ സിനിമകളുടെ കഥകള്‍ കേള്‍ക്കുന്നുണ്ട്. നല്ലൊരു സിനിമ ഉടന്‍ തുടങ്ങാനാകുമെന്നാണ് പ്രതീക്ഷിക്കുന്നത്. റഹ്മാനൊപ്പം ചെയ്ത പഗടി ആട്ടം എന്ന ചിത്രം കണ്ടാണ് സച്ചിയേട്ടന്‍ അയ്യപ്പനും കോശിയും എന്ന ചിത്രത്തിലേക്ക് തന്നെ വിളിച്ചത്. സച്ചിയേട്ടന്റെ സിനിമയില്‍ എപ്പോഴും സ്ത്രീകഥാപാത്രങ്ങള്‍ക്ക് ഒരു പ്രാധാന്യമുണ്ട്, അതുകൊണ്ട് താന്‍ കണ്ണുംപൂട്ടി സമ്മതിക്കുകയായിരുന്നു.

‘ കണ്ണമ്മയ്ക്കായി ഞാന്‍ ഒരുപാട് എഫേര്‍ട്ടെടുത്തിരുന്നു. ഡയറ്റിങ് ചെയ്ത് ഭാരം കുറച്ചു. കണ്ണമ്മ എന്ന കഥാപാത്രം അട്ടപ്പാടിയിലെ ആദിവാസി ഗോത്രത്തില്‍പ്പെട്ട ഒരാളാണ്. അതുകൊണ്ടു തന്നെ മെലിഞ്ഞ, അല്പം പരുക്കനായ ഒരു ശരീരപ്രകൃതമായിരിക്കും അവര്‍ക്കെന്ന് സച്ചിയേട്ടന്‍ പറഞ്ഞിരുന്നു.

ആ കഥാപാത്രത്തോടുള്ള ഇഷ്ടംകൊണ്ടുതന്നെ അതിനുശേഷം കഠിനമായ ഡയറ്റിങ് നടത്തി. മിതമായ രീതിയില്‍ പച്ചക്കറികള്‍ മാത്രമാണ് കഴിച്ചിരുന്നത്. ചില ദിവസങ്ങളില്‍ പട്ടിണിപോലും കിടന്നിട്ടുണ്ട്. ഒപ്പം കഠിനമായ വ്യായാമമുറകളും ചെയ്തു. സെറ്റിലെത്തിയപ്പോള്‍ രാജുവേട്ടനും ബിജുവേട്ടനുമൊക്കെ അഭിനന്ദിച്ചു. കഥാപാത്രമാകാന്‍ നന്നായി കഷ്ടപ്പെട്ടിട്ടുണ്ടല്ലേ, നന്നാകട്ടെ, എന്ന് അവര്‍ പറഞ്ഞു. ഇനിയും അത്തരം എഫേര്‍ട്ടുകളാവശ്യമായ കഥാപാത്രങ്ങള്‍ വന്നാല്‍ ചെയ്യാന്‍ സന്തോഷമാണ്. ഇപ്പോള്‍ പുതിയ കഥകള്‍ കേള്‍ക്കുന്നുണ്ട്. പിന്നെ സിനിമയാണല്ലോ, എപ്പോള്‍ സംഭവിക്കുമെന്ന് നമുക്ക് കൃത്യമായി പറയാനാകില്ലല്ലോ. നല്ലത് സംഭവിക്കട്ടെയെന്നാണ് ആഗ്രഹം,’. ഗൗരി പറഞ്ഞു.