കുട്ടിത്തതിന്റെ മറ പിടിച്ച് കളി തുടങ്ങിയ ഫുക്രു ഇപ്പോള്‍ ട്രാക്ക് മാറ്റിപിടിച്ചിരിക്കുകയാണ്. ഇത്രയും ദിവസം ഒപ്പം നിന്നവര്‍ക്കെതിരെ തന്നെയാണ് ഫുക്രു ഇപ്പോള്‍ തിരിഞ്ഞിരിക്കുന്നത്. ഡെയിലി ടാസ്‌കില്‍ മഞ്ജുവിനെയും ലക്ഷ്വറി ടാസ്‌കില്‍ വീണയെയും തള്ളിയ ഫുക്രുവിന്റെ പുതിയ യുദ്ധം രഘുവിനെതിരെയാണ്. രഘു എപ്പോഴും സ്ത്രീകളുടെ പക്ഷത്ത് മാത്രമാണെന്നതാണ് ഫുക്രുവിന്റെ പ്രധാന ആരോപണം.
ലക്ഷ്വറി ടാസ്‌കില്‍ രഘു സ്ത്രീകള്‍ കൂടുതലടങ്ങുന്ന ടീമിനൊപ്പം നിന്നത് ചൂണ്ടിക്കാട്ടിയായിരുന്നു ഫുക്രുവിന്റെ തുടക്കം. എന്നാല്‍ പഷാണം ഷാജിയും പ്രദീപുമടങ്ങുന്നവര്‍ ഡെയിലി ടാസ്‌കിലെ മുന്‍വൈരാഗ്യം തീര്‍ത്തപ്പോള്‍ രഘു നിലപാടെടുത്തതിലുള്ള ഫുക്രുവിന്റെ വിരോധമാണ് പ്രകടമായത്. രഘു സ്ത്രീകള്‍ക്ക് പ്രത്യേക പരിഗണന കൊടുക്കുന്നെന്നും സ്ത്രീകളെ മാത്രമാണ് പിന്തുണയ്ക്കുന്നതെന്നുമുള്ള ഫുക്രുവിന്റെ ആരോപണം രഘുവുമായുള്ള വാക്കുതര്‍ക്കത്തിലേക്ക് എത്താന്‍ അധികം താമസിച്ചില്ല.
ഫുക്രുവും രേഷ്മയുമായുള്ള തര്‍ക്കത്തിനിടയില്‍ രഘു രേഷ്മയെ പിന്തുണച്ചിടത്തുനിന്നാണ് വാക്‌പോര് തുടങ്ങിയത്. പെണ്ണുങ്ങളുടെ ഭാഗത്ത് മാത്രം നില്‍ക്കാതെ ആണുങ്ങളുടെ കൂടെ നില്‍ക്ക് എന്നായിരുന്നു ഫുക്രുവിന്റെ ഉപദേശം. എല്ലാവരെയും ഒരുപോലെ കാണണം എന്നാവശ്യപ്പെട്ട ഫുക്രുവിനോട് എല്ലാവരെയും ഒരുപോലെ കാണാന്‍ കഴിയില്ലെന്നും അത് ഫുക്രുവിന് ഇപ്പോള്‍ പറഞ്ഞാല്‍ മനസിലാകില്ല എന്നുമായിരുന്നു രഘുവിന്റെ വിശദീകരണം.
രേഷ്മയെ കുറ്റം പറഞ്ഞിരുന്ന ആളിപ്പോള്‍ അവളുടെ തോളത്ത് കയ്യിട്ടിരിക്കുന്നു എന്നു ചൂണ്ടിക്കാട്ടി രഘുവിന്റെ ചുവടുമാറ്റം പൊളിക്കാനായിരുന്നു ഫുക്രുവിന്റെ ഉദ്ദേശം. എന്നാല്‍ ഫുക്രുവിനെ കൃത്യമായി കൈകാര്യം ചെയ്ത രഘു ആ തര്‍ക്കം തന്റേതാക്കി മാറ്റുകയായിരുന്നു. രഘുവിന്റെ വാക്കുകേട്ട് രേഷ്മയ്‌ക്കെതിരെ വോട്ട് ചെയ്‌തെന്ന് ഫുക്രു പറഞ്ഞപ്പോള്‍ അവിടെ യഥാര്‍ത്ഥ ജയം രഘുവിനൊപ്പമായിരുന്നു. ഇത് കൃത്യമായി സ്ഥാപിച്ചെടുക്കാനും രഘുവിനായി. ‘നില്‍റെ തലച്ചോറിനുള്ളില്‍ കയറി നിന്നെക്കൊണ്ട് ഒരാള്‍ക്കെതിരെ വോട്ട് ചെയ്യിപ്പിക്കാന്‍ കഴിഞ്ഞിട്ടുണ്ടെങ്കില്‍ അത് എന്റെ വിജയമാണെന്നാണ് രഘു നല്‍കിയ മറുപടി.
Post Your Comments