തിരുവനന്തപുരം: സംസ്ഥാനത്ത് ജനങ്ങള്ക്ക് ജാഗ്രതാ നിര്ദേശവുമായി കേന്ദ്ര കാലാവസ്ഥാ നിരീക്ഷണ കേന്ദ്രം. കേരളത്തില് ഈയാഴ്ച ചൂട് പതിവിലും കൂടുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. ഇതിന്റെ അടിസ്ഥാനത്തില് സംസ്ഥാന ദുരന്ത നിവാരണ അതോറിറ്റി ജാഗ്രതാനിര്ദേശം നല്കി. ശരാശരിയില് നിന്ന് 4 ഡിഗ്രി വരെ വര്ധിക്കാമെന്നാണ് കാലാവസ്ഥാ വകുപ്പിന്റെ പ്രവചനം. പാലക്കാട്, തൃശൂര്, മലപ്പുറം, കോഴിക്കോട് ജില്ലകളില് അടുത്ത ദിവസങ്ങളില് ചൂട് വളരെ കൂടുമെന്നും മുന്നറിയിപ്പുണ്ട്.
കോഴിക്കോട്ട് ഇന്നലെ 36.5 ഡിഗ്രി വരെ ചൂടുയര്ന്നു. ശരാശരിയില് നിന്ന് 3.4 ഡിഗ്രി അധികമാണിത്. പാലക്കാട്ട് 37.7 ഡിഗ്രിയാണ് ഉയര്ന്ന ചൂടെങ്കിലും ശരാശരിയില് നിന്ന് 1 ഡിഗ്രി മാത്രമേ കൂടിയിട്ടുള്ളൂ. ഈ സാഹചര്യത്തില് രാവിലെ 11 മുതല് ഉച്ചകഴിഞ്ഞ് 3 വരെ നേരിട്ടു വെയിലേല്ക്കുന്ന ജോലികള് ഒഴിവാക്കണമെന്നും നിര്ജലീകരണം ഒഴിവാക്കാന് നിരന്തരം വെള്ളം കുടിക്കണമെന്നും ദുരന്തനിവാരണ അതോറിറ്റി അറിയിച്ചു. കുട്ടികളെ ഉച്ചവെയിലത്ത് കളിക്കാന് വിടരുത്. കോട്ടണ് വസ്ത്രങ്ങള് ധരിക്കണമെന്നും അതോറിറ്റി അറിയിച്ചു.
Post Your Comments