കൈറോ: അള്‍ജീരിയയില്‍ കുട്ടികളുടെ ആശുപത്രിയിലുണ്ടായ തീപിടുത്തത്തില്‍ ഏട്ടോളം നവജാത ശിശുക്കള്‍ വെന്തുമരിച്ചു. എല്‍ ഗൈ്വയ്ദിലെ സ്വകാര്യആശുപത്രിയിലുണ്ടായ അഗ്‌നിബാധയിലാണ് കുട്ടികള്‍ക്ക് ദാരുണാന്ത്യം. ചൊവ്വാഴ്ച പുലര്‍ച്ചെ നാല് മണിയോടെയാണ് ആശുപത്രിയില്‍ തീപടര്‍ന്നത്.
അപകടത്തില്‍ നിന്നും 76 പേരെ രക്ഷപ്പെടുത്തിയതായി അള്‍ജീരിയന്‍ സിവില്‍ ഡിഫന്‍സ് റിപ്പോര്‍ട്ട് ചെയ്തു. ഇതില്‍ 11 പേര്‍ നവജാതശിശുക്കളാണ്. മറ്റ് 37 പേര്‍ സ്ത്രീകളും 28 പേര്‍ ആശുപത്രി ജീവനക്കാരുമാണ്. കൊതുകിനെ നശിപ്പിക്കാനുപയോഗിച്ചിരുന്ന വസ്തുവില്‍ നിന്നാണ് തീപടര്‍ന്നതെന്നാണ് പ്രാഥമിക നിഗമനം. ഒരു പ്രാദേശിക ചാനലിന് നല്‍കിയ അഭിമുഖത്തില്‍ അള്‍ജീരിയയിലെ ആരോഗ്യമന്ത്രി മുഹമ്മദ് മിറോയിയാണ് ഇക്കാര്യം വ്യക്തമാക്കിയത്.
18 മാസത്തിനിടയില്‍ ഇത് രണ്ടാമത്തെ പ്രാവശ്യമാണ് കുട്ടികള്‍ക്കായുള്ള ആശുപത്രിയില്‍ അഗ്‌നിബാധയുണ്ടാകുന്നത്. 2018 മെയ്യില്‍ അഗ്‌നിബാധയുണ്ടായെങ്കിലും കെട്ടിടത്തിന് തകരാറ് സംഭവിച്ചതല്ലാതെ ആളപായമുണ്ടായിരുന്നില്ല. സംഭവത്തില്‍ വിശദമായ അന്വേഷണം നടത്താന്‍ പ്രധാനമന്ത്രി ഉത്തരവിട്ടതായാണ് റിപ്പോര്‍ട്ട്.
Post Your Comments