കൊച്ചി: കോണ്‍ഗ്രസിനെ തകര്‍ക്കുന്നത് മുന്‍ മുഖ്യമന്ത്രിയും പ്രതിപക്ഷ നേതാവും, ഉമ്മന്‍ ചാണ്ടിയ്ക്കും രമേശ് ചെന്നിത്തലയ്ക്കും എതിരെ ശക്തമായി ആഞ്ഞടിച്ച് എഐസിസി പ്രവര്‍ത്തക സമിതി അംഗം പി സി ചാക്കോ. രാഹുല്‍ ഗാന്ധി അമേഠിയില്‍ തോറ്റതിന് കാരണം വയനാട്ടില്‍ മത്സരിച്ചതാണെന്നും ഇടതുപക്ഷത്തിന് എതിരേയായിരുന്നില്ല മത്സരിക്കേണ്ടിയിരുന്നത് എന്നും അദ്ദേഹം പറഞ്ഞു.
കെപിസിസി പുനഃസംഘടന നീണ്ടുപോകുന്നതിന്റെ ഉത്തരവാദികള്‍ ഉമ്മന്‍ചാണ്ടിയും രമേശ് ചെന്നിത്തലയും തന്നെയാണ്. യാതൊരു മാനദണ്ഡങ്ങളും പാലിക്കാതെ, തങ്ങളുടെ ഇഷ്ടക്കാരെ അവര്‍ ലിസ്റ്റില്‍ തിരുകിക്കയറ്റുകയായിരുന്നു എന്ന് അദ്ദേഹം പറഞ്ഞു.
ആളുകളെ എടുക്കുന്നതിന് വ്യക്തമായ മാനദണ്ഡങ്ങള്‍ വേണമെന്ന് താനടക്കമുള്ളവര്‍ ആവശ്യപ്പെട്ടിരുന്നു. എംഎല്‍എമാരെ മാറ്റിനിര്‍ത്തണമെന്നും പലതവണ ഭാരവാഹിത്വം വഹിച്ചവരെ നീക്കണമെന്നും നിര്‍ദേശങ്ങള്‍ ഉണ്ടായിരുന്നു. എന്നാല്‍ അതൊന്നും പരിഗണിക്കാന്‍ ഉമ്മന്‍ചാണ്ടിയും ചെന്നിത്തലയും തയ്യാറായില്ല. അവര്‍ തങ്ങളുടെ ഇഷ്ടക്കാരെ മുഴുവന്‍ തള്ളിക്കയറ്റിയപ്പോള്‍, ലിസ്റ്റ് ജമ്പോ ആയി മാറി.
സംസ്ഥനാത്തെ പാര്‍ട്ടി സംവിധാനം തളര്‍ന്നിരിക്കുകയാണ്. വട്ടിയൂര്‍ക്കാവ്, കോന്നി തോല്‍വികള്‍ കനത്ത തിരിച്ചടിയാണ് പാര്‍ട്ടിക്കുണ്ടാക്കിയത്. അതിലും വലിയ തിരിച്ചടിയാണ് എറണാകുളത്ത് നിറംമങ്ങിയ ജയത്തിലൂടെ ഉണ്ടായത്. എറണാകുളത്ത് പാര്‍ട്ടി ഇല്ലാത്ത അവസ്ഥയാണ്. മണ്ഡലം കമ്മിറ്റികള്‍ എല്ലാം ‘എ’, ‘ഐ’ എന്ന പേരില്‍ വീതംവെച്ചിരിക്കുകമാത്രമാണ്. ഒരു പ്രവര്‍ത്തനവും നടക്കുന്നില്ലെന്നും അദ്ദേഹം പറഞ്ഞു.
Post Your Comments