പുതിയ വിമാന സർവീസുകൾ ആരംഭിച്ച് എയര്‍ ഏഷ്യ : ഒരെണ്ണം കേരളത്തിൽ നിന്നും

കൊച്ചി : പുതിയ രണ്ടു വിമാന സർവീസുകൾ ആരംഭിച്ച് എയര്‍ ഏഷ്യ. ഇന്ത്യയിലെ വിവിധ നഗരങ്ങളെ ബന്ധപ്പെടുത്തി നോണ്‍-സ്റ്റോപ്പ് സര്‍വീസുകളുടെ ശൃംഖല ആരംഭിക്കുക എന്ന ലക്ഷ്യത്തിന്റെ ഭാഗമായി ഡിസംബര്‍ 20 മുതല്‍ ന്യൂഡല്‍ഹി-കൊച്ചി, ന്യൂഡല്‍ഹി-അഹമ്മദാബാദ് റൂട്ടുകളിലാണ് സർവീസ് ആരംഭിച്ചത്.

Also read : കൊടുംചൂട്, പക്ഷികള്‍ ചത്തുവീഴുന്നു

ന്യൂഡല്‍ഹില്‍ നിന്നും രാവിലെ 4:55 പുറപ്പെടുന്ന വിമാനം 8 മണിക്ക് കൊച്ചിയിലെത്തും. തിരിച്ച് 8.50 ന് കൊച്ചിയില്‍ നിന്നും പുറപ്പെടുന്ന വിമാനം ഉച്ചക്ക് 12 മണിക്ക് ന്യൂഡല്‍ഹിയില്‍ തിരികെയെത്തും വിധമാണ് സമയം ക്രമീകരിച്ചിരിക്കുന്നത്. ന്യൂഡല്‍ഹി-കൊച്ചി റൂട്ടിൽ 3915 രൂപയും, ന്യൂഡല്‍ഹി-അഹമ്മദാബാദിൽ 2015 രൂപയുമാണ് ടിക്കറ്റ് നിരക്ക്.

ന്യൂഡല്‍ഹി-കൊച്ചി, ന്യൂഡല്‍ഹി-അഹമ്മദാബാദ് റൂട്ടുകളില്‍ പുതിയ സര്‍വീസ് ആരംഭിക്കുന്നതോടെ ഇന്ത്യയിലെമ്പാടുമായുള്ള ശൃംഖല ശക്തിപ്പെടുത്തുകയാണെന്നും 2020-2021 വര്‍ഷത്തേയ്ക്ക് സര്‍വീസുകള്‍ വിപുലമാക്കുന്നതിനുള്ള പദ്ധതിയുടെ ഭാഗമായി കൂടുതൽ റൂട്ടുകളില്‍ സര്‍വീസ് ആരംഭിക്കാന്‍ സാധിക്കുമെന്ന ആത്മവിശ്വാസമുണ്ടെന്നും എയര്‍ഏഷ്യ ചീഫ് കൊമേഴ്‌സ്യല്‍ ഓഫീസര്‍ അങ്കുര്‍ ഗാര്‍ഗ് പറഞ്ഞു. ഇന്ത്യയിലെ 21 സ്ഥലങ്ങളിലേക്കായി എയര്‍ഏഷ്യ ഇന്ത്യ 27 വിമാന സർവീസുകളാണ് നടത്തുന്നത്.