തിരുവനന്തപുരം: കെ.എസ്.ആര്‍.ടി.സിയില്‍ ട്രേഡ് യൂണിയനുകൾ നടത്തി വന്ന സമരം ഗതാഗത മന്ത്രിയുമായി നടത്തിയ ചര്‍ച്ചയില്‍ ഒത്തുതീര്‍പ്പായി. മുടക്കമില്ലാതെ ശമ്പളം വിതരണം ചെയ്യുമെന്ന മന്ത്രിയുടെ ഉറപ്പിനെ തുടർന്നാണ് സി.ഐ.ടി.യു, എ.ഐ.ടി.യു.സി, ടി.ഡി.എഫ് എന്നീ സംഘടനകള്‍ സമരം പിന്‍വലിച്ചത്. കിഫ്ബിയുടെ സഹായത്തോടെ 1000 ബസുകൾ വാങ്ങും. ഇതിന് കിഫ്ബിയുടെ വ്യവസ്ഥകളില്‍ ഇളവ് വരുത്താന്‍ ആവശ്യപ്പെടുമെന്നും മന്ത്രി എ.കെ. ശശീന്ദ്രന്‍ ചര്‍ച്ചയില്‍ വ്യക്തമാക്കി. സാമ്പത്തിക പ്രതിസന്ധിക്ക് പരിഹാരം കാണുന്നതിന് മുഖ്യമന്ത്രിയുടെ നേതൃത്വത്തില്‍ ഉന്നതതല യോഗം ചേരുമെന്നും ചർച്ചയിൽ തീരുമാനമായി.
സംഘടനകളുമായും മാനേജ്‌മെന്‍റുമായി സര്‍ക്കാര്‍ ത്രികക്ഷി കരാര്‍ ഉണ്ടാക്കും. കരാറിന്‍റെ കരട് തയാറാക്കുന്നതിന് ധനകാര്യ സെക്രട്ടറി, ഗതാഗത പ്രിന്‍സിപ്പല്‍ സെക്രട്ടറി, കെ.എസ്.ആര്‍.ടി.സി സി.എം.ഡി എന്നിവരെ ചുമതലപ്പെടുത്തി. ടിക്കറ്റ് മെഷീന്‍ വാങ്ങാന്‍ സര്‍ക്കാര്‍ സഹായം നല്‍കും. ആശ്രിത നിയമനം സംബന്ധിച്ച പരാതികള്‍ പരിഗണിക്കാന്‍ എം.ഡിയെ ചുമതലപ്പെടുത്തി. സ്ഥലംമാറ്റം, ആനുകൂല്യ വിതരണം എന്നിവയിലെ പരാതികള്‍ എം.ഡി ചര്‍ച്ച ചെയ്ത് പരിഹരിക്കാനും ചർച്ചയിൽ തീരുമാനമായി.
ഗതാഗത സെക്രട്ടറി കെ.ആര്‍. ജ്യോതിലാല്‍, കെ.എസ്.ആര്‍.ടി.സി മാനേജിങ് ഡയറക്ടര്‍ എം.പി. ദിനേശ്, വിവിധ സംഘടനകളെ പ്രതിനിധീകരിച്ച്‌ ആനത്തലവട്ടം ആനന്ദന്‍, തമ്ബാനൂര്‍ രവി, വി. ശിവന്‍കുട്ടി, സി.കെ. ഹരികൃഷ്ണന്‍, എം.ജി. രാഹുല്‍, ആര്‍. ശശിധരന്‍ നായര്‍, സണ്ണി തോമസ് തുടങ്ങിയവര്‍ പങ്കെടുത്തു. കോണ്‍ഗ്രസ് അനുകൂല സംഘടനകളുടെ കൂട്ടായ്മയായ ടി.ഡി.എഫ് (ട്രാന്‍സ്‌പോര്‍ട്ട് ഡെമോക്രാറ്റിക്ക് ഫെഡറേഷന്‍) 20 മുതല്‍ അനിശ്ചിതകാല പണിമുടക്ക് പ്രഖ്യാപിച്ചിരുന്നു. ധാരണയായ സാഹചര്യത്തില്‍ പണിമുടക്കും പിന്‍വലിച്ചിട്ടുണ്ട്.
Post Your Comments