ഇന്ത്യയിലേക്കുള്ള എല്ലാ വിമാനങ്ങളും റദ്ദാക്കി യു.എ.ഇ വിമാനക്കമ്പനി

 

ദുബായ്•ഇന്ത്യന്‍ അധികൃതരുടെ നിര്‍ദ്ദേശത്തെത്തുടര്‍ന്ന് മാർച്ച് 17 നും 31 നും ഇടയിൽ ഇന്ത്യയിലേക്കും പുറത്തേക്കുമുള്ള വിമാനങ്ങള്‍ നിര്‍ത്തി വയ്ക്കുമെന്ന് ഫ്ലൈ ദുബായ് അറിയിച്ചു.

ലോകാരോഗ്യ സംഘടനയും പ്രാദേശിക ആരോഗ്യ അധികാരികളും പുറപ്പെടുവിച്ച നിർദ്ദേശങ്ങളുടെ അടിസ്ഥാനത്തിൽ ഇറ്റലി, സ്ലൊവാക്യ, പോളണ്ട്, ദക്ഷിണ സുഡാൻ, ജോർദാൻ, ഇറാഖ്, ലെബനൻ, ഈജിപ്ത് തുടങ്ങി നിരവധി രാജ്യങ്ങളിലേക്കുള്ള വിമാനങ്ങൾ ഫ്ലൈദുബായ് താൽക്കാലികമായി നിർത്തിവച്ചിട്ടുണ്ട്.

അതേസമയം, പാകിസ്ഥാനിലെ അധികാരികളുടെ നിർദേശത്തെത്തുടർന്ന്, പാകിസ്ഥാനിലെ വിവിധ സ്ഥലങ്ങളിലേക്ക് പറന്നുയർന്ന നിരവധി വിമാനങ്ങള്‍ ഫ്ലൈദുബായ് തിരിച്ചുവിട്ടു. മാർച്ച് 14 മുതൽ 17 വരെ സിയാൽകോട്ടിലേക്കും തിരിച്ചുമുള്ള ഫ്ലൈറ്റുകൾ ഇസ്ലാമാബാദിലേക്ക് മാറ്റും. ഫൈസലാബാദിലേക്കും മുൾട്ടാനിലേക്കും പുറപ്പെടുന്ന വിമാനങ്ങളും മാർച്ച് 15 മുതൽ 17 വരെ ഇസ്ലാമാബാദിലേക്ക് മാറ്റും.

മാർച്ച് 16, 17 തീയതികളിൽ ക്വറ്റയിലേക്കും തിരിച്ചുമുള്ള വിമാനങ്ങൾ റദ്ദാക്കുകയും കറാച്ചിയില്‍ നിന്നുള്ള വിമാനങ്ങളിൽ യാത്രക്കാരെ വീണ്ടും ബുക്ക് ചെയ്യുകയും ചെയ്യും. അതേസമയം, കറാച്ചിയിലേക്കും തിരിച്ചുമുള്ള വിമാനങ്ങൾ ഷെഡ്യൂൾ പ്രകാരം തുടരും.

യഥാർത്ഥ യാത്രാ തീയതി മുതൽ 60 ദിവസം വരെ യാത്ര ചെയ്യാൻ ഉപയോക്താക്കൾക്ക് റീബുക്ക് ഓപ്ഷനും കമ്പനി സൗജന്യമായി വാഗ്ദാനം ചെയ്യുന്നുണ്ട്.