ഭോപാല്‍: കേന്ദ്രമന്ത്രി രാംദാസ് അത്തേവാലയുടെ ‘ഗോ കൊറോണ ഗോ’ മന്ത്രത്തിന് പിന്നാലെ ചൂട്ടുംകത്തിച്ച്‌ മുദ്രാവാക്യം മുഴക്കി കൊറോണയെ ‘തുരത്തിയോടിച്ച്‌’ മധ്യപ്രദേശിലെ ഗ്രാമവാസികള്‍. കൊറോണയോട് ഓടാന്‍ ആവശ്യെപ്പടുന്ന മുദ്രാവാക്യം മുഴക്കി ഗ്രാമവാസികള്‍ ചൂട്ടുംകത്തിച്ച്‌ ഓടുന്ന വിഡിയോ ദൃശ്യങ്ങള്‍ പുറത്തുവന്നു. അഗര്‍ മാല്‍വ ജില്ലയിലെ ഗണേഷ്പുര ഗ്രാമത്തില്‍ ഞായറാഴ്ച രാത്രിയാണ് സംഭവം. ഗ്രാമവാസികള്‍ ചൂട്ടുംകത്തിച്ച്‌ തെരുവിലൂടെ ‘ഭാഗ് കൊറോണ ഭാഗ് (ഓടൂ കൊറോണ ഓടൂ)’ മുദ്രാവാക്യം മുഴക്കി ഓടുന്നതാണ് ദൃശ്യങ്ങള്‍. ചൂട്ടുകള്‍ ശക്തിയില്‍ വീശുന്നതും ഗ്രാമത്തിന് പുറത്തേക്ക് എറിയുന്നതും വിഡിയോയില്‍ കാണാം.
Also Read:കോവിഡ് രൂക്ഷമായപ്പോൾ വ്യാജ വാർത്തകളുമായി സാമൂഹ്യ ദ്രോഹികൾ , പൊളിച്ചടുക്കി സോഷ്യൽ മീഡിയ
ഈ പ്രവര്‍ത്തിയിലൂടെ കോവിഡ് ശാപം തങ്ങളുടെ ഗ്രാമത്തില്‍നിന്ന് ഒഴിഞ്ഞുപോകുമെന്ന് അവര്‍ വിശ്വസിക്കുന്നു. ഗ്രാമത്തില്‍ ഒരു മഹാമാരി പടര്‍ന്നുപിടിച്ചാല്‍ എല്ലാ വീട്ടില്‍നിന്നും ഒരാള്‍ ഇങ്ങനെ ചെയ്യണം. വീട്ടില്‍നിന്ന് തീ കൊളുത്തുന്ന പന്തം ഗ്രാമാതിര്‍ത്തിയില്‍ കൊണ്ടുകളയണം. ഇൗ ചടങ്ങായിരുന്നു ഞായറാഴ്ച നടന്നത്. എല്ലാവരും പന്തം കത്തിച്ച്‌ ഗ്രാമത്തിന് പുറത്തുകൊണ്ടുകളഞ്ഞു. തങ്ങളുടെ മുതിര്‍ന്നവര്‍ പറഞ്ഞുതന്നതാണിതെന്നും പ്രദേശവാസികള്‍ പറയുന്നു.
രണ്ടുമൂന്നുവര്‍ഷം മുമ്ബ് ഗണേഷ്പുരയില്‍ ഓരോ ദിവസവും ഓരോ വീട്ടിലായി ഒരു മരണം വീതം റിപ്പോര്‍ട്ട് ചെയ്തു. പനിവന്നായിരുന്നു കൂടുതല്‍ മരണം. ഇതോടെ ഒരു ഞായറാഴ്ച ഇത്തരമൊരു ചടങ്ങ് നടത്തിയതോടെ പിന്നീട് ഒരാള്‍ക്ക് പോലും രോഗം സ്ഥിരീകരിച്ചിട്ടില്ല -ഗ്രാമവാസികളില്‍ ഒരാള്‍ കൂട്ടിച്ചേര്‍ത്തു. രാജ്യത്ത് കോവിഡ് പടര്‍ന്നുപിടിച്ച കഴിഞ്ഞവര്‍ഷം കേന്ദ്രമന്ത്രി രാംദാസ് അത്തേവാലയുടെ ’ഗോ കൊറോണ ഗോ കൊറോണ’ മുദ്രാവാക്യം വൈറലായിരുന്നു. ലോകം മുഴുവന്‍ ഗോ കൊറോണ ഗോ മുദ്രാവാക്യം മുഴക്കിയെന്നായിരുന്നു മന്ത്രിയുടെ പ്രതികരണം.
Post Your Comments