ന്യൂഡല്‍ഹി: കോവിഡ് 19ന്‍റെ രണ്ടാം തരംഗത്തില്‍ ഡൽഹി വിറയ്ക്കുകയാണ്. ഡൽഹിയിലെ സ്ഥിതി രൂക്ഷമാകുമ്പോൾ ഓരോ ദിവസവും പുറത്തുവരുന്നത് ഞെട്ടിക്കുന്ന കാഴ്ചകളാണ്. ആശുപത്രി കിടക്കകളുടെ അഭാവവും ഓക്സിജന്‍ ക്ഷാമവും ഡൽഹിയെ വലിയ തോതിൽ ബാധിച്ചിരിക്കുകയാണ്. പ്രതിദിനം 300 കോവിഡ് രോഗികളാണ് ഇവിടെ മരിച്ചുവീഴുന്നത്. മരണനിരക്ക് ഉയർന്നതോടെ മരണപ്പെട്ട ഉറ്റവരുടെ മൃതദേഹവുമായി ശ്‌മശാനത്തിൽ കാത്ത് നിൽക്കുന്നവരുടെ ഒരു വലിയ നിര തന്നെയുണ്ട്.
മരണ നിരക്ക് ഉയർന്നതോടെ സംസ്ഥാനത്ത് മൃതദേഹം സംസ്കരിക്കാൻ സ്ഥലം തികയാതെ വാരിയകയാണ്. ഈ പ്രശ്നത്തിന് അധികൃതർ കണ്ടെത്തിയ മാർഗം നായ്ക്കളുടെ ശ്മശാനം മനുഷ്യരുടേതാക്കി മാറ്റുക എന്നതാണ്. സംസ്ഥാനത്ത് നായ്ക്കള്‍ക്കായി പണിത ശ്മശാനം കോവിഡ് ബാധിച്ച്‌ മരിച്ചവരുടെ മൃതദേഹം സംസ്കരിക്കാനുള്ള ഇടമാക്കിയിരിക്കുകയാണ്. ദ്വാരക സെക്ടര്‍ 29ല്‍ മൂന്നു ഏക്കറിലാണ് ശ്മശാനം. നായ്ക്കള്‍ക്കായി തയാറാക്കിയ ശ്മശാനത്തില്‍ മനുഷ്യ മൃതദേഹം ദഹിപ്പിക്കാന്‍ താല്‍ക്കാലിക സംവിധാനം ഒരുക്കിയിരിക്കുകയാണെന്ന് അധികൃതര്‍ അറിയിച്ചു. തെക്കന്‍ ഡല്‍ഹി മുനിസിപ്പല്‍ കോര്‍പറേഷന്‍ അധികൃതര്‍ ആണ് ഇത് സംബന്ധിച്ച സ്ഥിരീകരണം നൽകിയത്.
ആറുമാസം മുമ്ബാണ് ഇവിടെ ശ്മശാനം പണിതത്. നായ്ക്കളെ സംസ്കരിക്കാനായിരുന്നു ഇത് പണിതത്. എന്നാൽ, ഇവിടെ നായ്ക്കളെ സംസ്കരിച്ചിട്ടില്ലെന്നും പ്രവര്‍ത്തനക്ഷമമായിരുന്നില്ലെന്നും അധികൃതര്‍ വ്യക്തമാക്കി. പ്രതിദിനം മരണസംഖ്യ ആയിരം വരെ ഉയര്‍ന്നേക്കാമെന്ന കണക്കുകൂട്ടലിലാണ് അധികൃതര്‍ ശ്മശാനങ്ങളുടെ ശേഷി വര്‍ധിപ്പിക്കുന്നത്. മരണനിരക്ക് ഉയര്‍ന്നതോടെ പാര്‍ക്കുകളിലും ശ്മശാനങ്ങളുടെ പാർക്കിംഗ് പ്രദേശത്തും താല്‍കാലിക സംവിധാനം അധികൃതര്‍ ഒരുക്കിയിരുന്നു.
Post Your Comments