ന്യൂഡല്‍ഹി: തീവണ്ടികള്‍ പാളം മാറുന്ന ശബ്ദം എല്ലാവര്‍ക്കും സുപരിചിതമാണ്. യാത്രയ്ക്കിടയില്‍ വലിയ ബുദ്ധിമുട്ടുകള്‍ ഉണ്ടാക്കാറില്ലെങ്കിലും ഈ ശബ്ദം പൂര്‍ണമായി ഒഴിവാക്കാനുള്ള തയ്യാറെടുപ്പിലാണ് ഇന്ത്യന്‍ റെയില്‍വേ. ഇതിനായുള്ള നടപടികള്‍ റെയില്‍വേ ആരംഭിച്ചു.
പാളം മാറുമ്പോഴുണ്ടാകുന്ന ശബ്ദം ഒഴിവാക്കാനുള്ള ഉപകരണം റെയില്‍വേ എത്തിച്ചുകഴിഞ്ഞു. കാന്റഡ് എന്ന ഉപകരണമാണ് ഇതിനായി ഉപയോഗിക്കുക. പ്രയാഗ് രാജിലെ സാന്‍സി റെയില്‍വെ സ്‌റ്റേഷനില്‍ നടത്തിയ കാന്റഡിന്റെ പരീക്ഷണം വിജയകരമായിരുന്നു. നിലവില്‍ ഈ ഉപകരണമാണ് മെട്രോ സ്‌റ്റേഷനുകളില്‍ ഉപയോഗിക്കുന്നത്.
നേരത്തെ, പാളങ്ങള്‍ മാറുമ്പോള്‍ തീവണ്ടികളുടെ വേഗം 15 കിലോ മീറ്ററായിരുന്നു. തിക്ക് വെബ് സ്വിച്ച് എന്ന ഉപകരണത്തിന്റെ സഹായത്തോടെ പാളം മാറുമ്പോള്‍ വേഗത 30 കിലോ മീറ്ററായി ഉയര്‍ത്താന്‍ സാധിച്ചിരുന്നു. എന്നാല്‍, ശബ്ദം ഒഴിവാക്കാന്‍ സാധിച്ചിരുന്നില്ല. ഈ സാഹചര്യത്തിലാണ് കാന്റഡ് ഉപയോഗിക്കാന്‍ റെയില്‍വേ തീരുമാനിച്ചത്. ഘട്ടം ഘട്ടമായി രാജ്യം മുഴുവന്‍ ഈ സംവിധാനം കൊണ്ടുവരാനാണ് റെയില്‍വേ ലക്ഷ്യമിടുന്നത്.
Post Your Comments