റഷ്യൻ അധിനിവേശം തടയുന്നതും സമാധാനം പുലരുന്നതുമാണ് ലക്ഷ്യം, പ്രതീക്ഷ കൈവിടില്ല: അന്റോണിയോ ഗുട്ടറസ്

കീവ് : റഷ്യയുടെ ഉക്രൈൻ അധിനിവേശം തടയുന്നതിനും, സമാധാനം പുലരുന്നതിനും വേണ്ടിയുള്ള പ്രവർത്തനങ്ങളിൽ നിന്നും പിന്മാറില്ലെന്ന് യുഎൻ സെക്രട്ടറി ജനറൽ അന്റോണിയോ ഗുട്ടറസ്. യുദ്ധം തടയുന്നതിനും, സമാധാനം പുലരുന്നതിനും വേണ്ടിയാണ് യുഎൻ നിലകൊള്ളുന്നത്. ആ ലക്ഷ്യം ഇന്ന് കൈവരിക്കാനായില്ല. എന്നാൽ, പ്രതീക്ഷ കൈവിടില്ലെന്നും, സമാധാനം പുനഃസ്ഥാപിക്കാനുള്ള പ്രവർത്തനങ്ങൾ തുടരുമെന്നും യുഎൻ സെക്രട്ടറി ജനറൽ ട്വീറ്റ് ചെയ്തു.

Also read: ഇനി കാരവാനിന്റെ ആഡംബരത്തിൽ കേരളം കാണാം: വാഗമണിൽ ആദ്യ കാരവാൻ പാർക്ക് തുറന്നു

ഉക്രൈനിൽ നിന്നും റഷ്യയുടെ സൈനിക പിന്മാറ്റം ആവശ്യപ്പെട്ടുകൊണ്ടുള്ള യുഎൻ രക്ഷാസമിതിയിലെ പ്രമേയം റഷ്യ വീറ്റോ ചെയ്തതിന് പിന്നാലെയാണ് അന്റോണിയോ ഗുട്ടറസിന്റെ ഈ പ്രതികരണം. യുഎൻ സുരക്ഷാ കൗൺസിലില്‍ ഉക്രൈൻ പ്രമേയത്തെ അമേരിക്കയടക്കം 11 രാജ്യങ്ങൾ പിന്തുണച്ചിരുന്നു. വോട്ടെടുപ്പിൽ നിന്നും ഇന്ത്യയും യുഎഇയും ചൈനയും വിട്ടുനിന്നു.

ചേരിചേരാനയം സ്വീകരിച്ച ഇന്ത്യ ചർച്ചയിലൂടെ ഉക്രൈൻ – റഷ്യ പ്രശ്നത്തിന് പരിഹാരം കാണണമെന്ന് യുഎന്നിനോട് ആവശ്യപ്പെട്ടു. പ്രശ്നം നയതന്ത്ര ചർച്ചയിലൂടെയാണ് പരിഹരിക്കേണ്ടതെന്നും, മനുഷ്യക്കുരുതി ഇല്ലാതാക്കണമെന്നും ഇന്ത്യൻ പ്രതിനിധി ടി.എസ് തിരുമൂർത്തി വ്യക്തമാക്കി. റഷ്യക്ക് എതിരായ പ്രമേയത്തിൽ ചൈനയുടെ പിന്മാറ്റവും അപ്രതീക്ഷിതമായിരുന്നു.