‘നിങ്ങൾ ഞങ്ങളോടൊപ്പമുണ്ടെന്ന് തെളിയിക്കുക’: യൂറോപ്യൻ യൂണിയനോട് വ്ലാഡിമർ സെലെൻസ്‌കി

കീവ് : റഷ്യൻ അധിനിവേശം തുടർന്നു കൊണ്ടിരിക്കെ യൂറോപ്യൻ യൂണിയൻ തങ്ങൾക്കൊപ്പമാണെന്ന് തെളിയിക്കണമെന്ന് യുക്രെയിൻ പ്രസിഡന്റ് വ്ലാഡിമർ സെലെൻസ്‌കി.

‘നിങ്ങൾ ഞങ്ങളോടൊപ്പമുണ്ടെന്ന് തെളിയിക്കുക. നിങ്ങൾ ഞങ്ങളെ പോകാൻ അനുവദിക്കില്ലെന്ന് തെളിയിക്കുക. നിങ്ങൾ തീർച്ചയായും യൂറോപ്യന്മാരാണെന്ന് തെളിയിക്കുക, അപ്പോൾ ജീവിതം മരണത്തെ ജയിക്കും, വെളിച്ചം ഇരുട്ടിനെ ജയിക്കും’ അദ്ദേഹം പറഞ്ഞു.

യുക്രെയിനിന് എല്ലാവിധ പിന്തുണയും നൽകുന്നതായി യൂറോപ്യൻ കമ്മീഷൻ വൈസ് പ്രസിഡന്റ് മാരോസ് സെഫ്‌കോവിക് പ്രതികരിച്ചു. കഴിഞ്ഞയാഴ്ച ഉക്രെയ്‌ൻ ആക്രമിച്ചതിന് ശേഷം റഷ്യയ്‌ക്കെതിരെ യൂറോപ്യൻ യൂണിയൻ ഉപരോധം ഏർപ്പെടുത്തിയിരുന്നു. കൂടാതെ, യൂറോപ്യൻ യൂണിയൻ യുക്രെയിനിന് ആയുധങ്ങൾ നൽകുമെന്നും അറിയിച്ചു.