Latest NewsNewsInternational

മങ്കി പോക്‌സ് വ്യാപകം: മുന്നറിയിപ്പുമായി ലോകാരോ​ഗ്യ സംഘടന

ആഫ്രിക്കൻ രാജ്യങ്ങൾക്ക് പുറത്ത് മങ്കി പോക്‌സ് വ്യാപിക്കാൻ തുടങ്ങിയതിന് ശേഷം ഇതുവരെ ആയിരത്തിലധികം കേസുകളാണ് സ്ഥിരീകരിച്ചത്.

ജനീവ: 29 രാജ്യങ്ങളിലായി നൂറിലധികം മങ്കി പോക്‌സ് കേസുകൾ സ്ഥിരീകരിച്ചതോടെ മുന്നറിയിപ്പുമായി ലോകാരോ​ഗ്യ സംഘടന. 29 രാജ്യങ്ങളിലായി നൂറിലധികം കേസുകളാണ് റിപ്പോർട്ട് ചെയ്തതെന്നും എന്നാൽ, ഈ രാജ്യങ്ങളിൽ ഇതുവരെ മരണം രേഖപ്പെടുത്തിയിട്ടില്ലെന്നും ലോകാരോഗ്യ സംഘടനയുടെ ഡയറക്ടർ ജനറൽ ടെഡ്രോസ് അദാനോം ഗെബ്രിയേസസ് പറഞ്ഞു. രോ​ഗം സ്ഥിരീകരിച്ച രാജ്യങ്ങളോട് രോ​ഗം പടരുന്ന സാഹചര്യത്തെക്കുറിച്ച് വിലയിരുത്താൻ നിർദ്ദേശം നൽകിയതായും ടെഡ്രോസ് അദാനോം ഗെബ്രിയേസസ് ട്വിറ്ററിലൂടെ വ്യക്തമാക്കി.

‘മങ്കി പോക്‌സ് ആന്റിവൈറലുകളും വാക്‌സിനുകളും ലോകാരോഗ്യ സംഘടന അം​ഗീകരിച്ചിട്ടുണ്ട്. എന്നാൽ, ഇവയുടെ വിതരണം പരിമിതമാണ്. രോ​ഗത്തെ ചെറുക്കാൻ ഒരു ഏകോപന സംവിധാനം വികസിപ്പിക്കാൻ ലോകാരോഗ്യ സംഘടന പ്രവർത്തിക്കുന്നുണ്ട്. രോ​ഗം വ്യാപിച്ച 29 രാജ്യങ്ങൾക്ക് ഉടൻ വാക്സിനേഷൻ ലഭ്യമാക്കും’- ടെഡ്രോസ് അദാനോം ഗെബ്രിയേസസ് പറഞ്ഞു.

അതേസമയം, ആഫ്രിക്കൻ രാജ്യങ്ങൾക്ക് പുറത്ത് മങ്കി പോക്‌സ് വ്യാപിക്കാൻ തുടങ്ങിയതിന് ശേഷം ഇതുവരെ ആയിരത്തിലധികം കേസുകളാണ് സ്ഥിരീകരിച്ചത്. നിരവധി കേസുകൾ നിരീക്ഷണത്തിലാണ്. യൂറോപ്പിലാണ് ഭൂരിഭാ​ഗം കേസുകളും സ്ഥിരീകരിച്ചതും നിരീക്ഷണത്തിലുള്ളതും.

shortlink

Related Articles

Post Your Comments


Back to top button