കണ്മുന്നിൽ സഫ്ന പിടഞ്ഞ് മരിക്കുന്നത് കാണേണ്ടി വന്നതിന്റെ ഞെട്ടലിൽ ആവണി

കലവൂർ: റോഡ് മുറിച്ചുകടന്ന വിദ്യാർത്ഥിനി കൂട്ടുകാരിയുടെ കൺമുന്നിൽ കെ.എസ്.ആർ.ടി.സി. ബസ് ഇടിച്ചു മരിച്ചു. മണ്ണഞ്ചേരി പനയ്ക്കൽ പള്ളിക്കു സമീപം കോയിപ്പറമ്പു വീട്ടിൽ സഫ്‌ന സിയാദ് (15) ആണു മരിച്ചത്. കലവൂർ ഗവ. ഹയർസെക്കൻഡറി സ്കൂളിലെ പത്താം ക്ലാസ് വിദ്യാർത്ഥിനിയാണ് മരിച്ച സഫ്ന.

ആലപ്പുഴ-മുഹമ്മ റോഡിൽ കോമളപുരത്ത് ശനിയാഴ്ച ഉച്ചയ്ക്ക് രണ്ടേകാലോടെ ആയിരുന്നു അപകടം. ട്യൂഷൻ സെന്ററിലേക്കു പോകാനായി സ്വകാര്യ ബസ് ഇറങ്ങി എതിർവശത്തേക്കു നടക്കുമ്പോഴായിരുന്നു അപകടം. ഇതേസമയം സ്വകാര്യ ബസിനെ മറികടന്നെത്തിയതായിരുന്നു കെ.എസ്.ആർ.ടി.സി. വേണാട് ബസ്. അമിതവേഗതയിലായിരുന്ന ബസ് സഫ്നയെ ഇടിച്ചു. മുന്നിലെ വലതു ടയറിനടിയിൽപ്പെട്ട സഫ്നയെയും കൊണ്ട് പത്ത് മീറ്ററോളം ബസ് മുന്നോട്ട് പോയി.

സഫ്നയുടെ സഹപാഠി ആവണിയുടെ കൺമുന്നിലായിരുന്നു അപകടം. സഫ്‌ന റോഡ് മുറിച്ചുകടക്കുന്നതിനിടയിൽ കെ.എസ്.ആർ.ടി.സി. ബസ് പാഞ്ഞുവരുന്നത് ആവണി കാണുന്നുണ്ടായിരുന്നു. ഉടൻ തന്നെ തിരിഞ്ഞ് ബസ് നിർത്താൻ ആവണി അലറിവിളിച്ചെങ്കിലും കാര്യമുണ്ടായില്ല. അപകടത്തെ തുടർന്ന് ഓടി രക്ഷപ്പെട്ട കെ.എസ്.ആർ.ടി.സി. ആലപ്പുഴ ഡിപ്പോയിലെ ഡ്രൈവർ നൗഷാദിനെ ആലപ്പുഴ നോർത്ത് പോലീസ് അറസ്റ്റുചെയ്തു.