ഡൽഹി: പാർട്ടിക്കെതിരെ പരസ്യപ്രസ്താവന നടത്തരുതെന്ന് പാർട്ടി നേതാക്കൾക്ക് മുന്നറിയിപ്പ് നൽകി അഖിലേന്ത്യാ കോൺഗ്രസ് കമ്മിറ്റി ഓർഗനൈസേഷൻ ജനറൽ സെക്രട്ടറി കെസി വേണുഗോപാൽ. കർണാടകയിൽ സർക്കാർ രൂപീകരിച്ചതിന് ശേഷം സ്ത്രീകളെയും പാവപ്പെട്ടവരെയും സാധാരണക്കാരെയും ശാക്തീകരിച്ച നാല് ഉറപ്പുകൾ നടപ്പിലാക്കുന്നതിൽ കോൺഗ്രസ് മികച്ച മാതൃകയാണ് കാഴ്ച വച്ചതെന്നും ‘കർണ്ണാടക മാതൃക’ ഇപ്പോൾ രാജ്യത്തുടനീളം ചർച്ച ചെയ്യപ്പെടുകയും അനുകരിക്കപ്പെടുകയും ചെയ്യുകയാണെന്നും വേണുഗോപാൽ പറഞ്ഞു.
‘ഈ ക്ഷേമ പ്രവർത്തനങ്ങളുടെ വിജയം ബിജെപിയെയും മറ്റ് പ്രാദേശിക പാർട്ടികളെയും അസ്വസ്ഥരാക്കി, വികസനത്തിൽ നിന്ന് ശ്രദ്ധ തിരിക്കാനും കൃത്രിമം കാണിക്കാനുമുള്ള പതിവ് തന്ത്രം അവർ പുതിയ പരീക്ഷണത്തിന് ശ്രമിക്കുന്നു, ഇതേതുടർന്ന് അവർ കർണാടക മുഖ്യമന്ത്രി സ്ഥാനവുമായി ബന്ധപ്പെട്ട് തികച്ചും ന്യായമല്ലാത്ത അഭ്യൂഹങ്ങൾ പരത്തുന്നു. ചില കോൺഗ്രസ് നേതാക്കളും മന്ത്രിമാരും ഇത്തരം വിഷയങ്ങളിൽ അഭിപ്രായം പറഞ്ഞതിൽ ആശങ്ക പ്രകടിപ്പിച്ചിട്ടുണ്ട്,’ കെസി വേണുഗോപാൽ പറഞ്ഞു.
‘കോൺഗ്രസ് നേതാക്കളുടെ പരസ്യ പ്രസ്താവനകൾ അച്ചടക്കത്തെയും ഐക്യത്തെയും ബാധിക്കും. പാർട്ടിയും സർക്കാരുമായി ബന്ധപ്പെട്ട വിഷയങ്ങൾ പൊതുവേദിയിൽ ഉന്നയിക്കരുതെന്ന് എല്ലാ പാർട്ടി നേതാക്കളോടും അഭ്യർത്ഥിക്കുന്നു. അത്തരത്തിലുള്ള ഏതൊരു പരാമർശവും പാർട്ടിയുടെ താൽപര്യത്തിന് വിരുദ്ധമാണ്. ഓരോ കോൺഗ്രസ് പ്രവർത്തകനും നേതാക്കളും ഇക്കാര്യം ശ്രദ്ധിക്കണം,’ വേണുഗോപാൽ വ്യക്തമാക്കി.
Post Your Comments